Tura, May 11: Garo Hills Autonomous District Council (GHADC)-o kam ka•enggiparang ja 33-ni dormaharangko man•kujaengani gimin kamtangtangko ka•gija jingjengattokengon, kam ka•giparang baksa changbrina agangrike jingjengataniko ra•pilchina mol•molahaoba chu•sokgipa ong•kujaenga ine GHADC-ni gital deputy chief executive membor Nikman Ch Marak, suk ong•gijaniko parakataha.
GHADC-o tangka paisarang dongsrangjaengani gimin kam ka•giparangko aro Non-Gazetted Employees Association (NGEA)-ni dilgiparangko gronge uamang, jabongani dormaharangko on•na ku•rachake, kamtangtangko ka•taipilchina mol•molahachim indiba kam ka•giparang, an•tangtangni jingjengataniko ra•galpilna jechaktokaiaha ine GHADC-ni deputy CEM parakataha.
Marak-ni parakatani gitade, GHADC-ni gital CEM-na seokako man•ani bakan Benedic Marak, GHADC-o kam ka•giparangko okame, uamangni dabienggipa kamrangni bidingo agangrikahachim indiba chu•sokgipa ong•jahachim.
Uni ja•man, April-ni 28 tarikoba GHADC-ni executive committee, mondolini dilgiparang, Nokma Council, NGO-rang aro gipin dilgiparangko okame apsan iani bidingo chanchirimangtaiahachim ine Marak parakataha.
“Ia tom•anio ‘Good Governance of GHADC’-ni bimingo dingtangmancha committee-ko bikote, ia committee-ni convenor-na Rev FD Sangma-ko songe donangaha aro April-ni 30 tariko Rev FD Sangma, dingtang dingtang mondolini dilgiparang baksa, GHADC-o kam ka•enggiparangko gronge agangriktaiahachim indiba ia tom•anioba GHADC-o kam ka•giparang, committee-ni mol•molaniko knachakjaha,” ine GHADC-ni deputy CEM parakataha.
Iani ja•manoba, executive committee aro opposition dolgnini MDC-rangan Tura circuit house-o tom•aniko ong•atangenba, high level committee-ko songaha aro ia committee-ni convenor-na ruling-oni deputy CEM Nikman Ch Marak aro co-convenor-na opposition doloni MDC Cherak W Momin-ko songe donangaha ine Marak parakataha.
High level committee-ko songani ja•man May-ni 4 tariko committee-ni dilgiparang, CEM-ni office-on NGEA-ni dilgiparangko aro mondolini dilgiparangko okame, jingjengataniko dontongchina aro kamrangko ka•pilchina GHADC-o kam ka•enggiparangko mol•moltaiahachim.
Marak-ni parakatani gitade, ia tom•anio kam ka•giparangna jagittamni dormahako on•na ku•rachake kamtangtangko ka•pilchina committee-ni membor-rang mol•molahaoba, uamang ja 12-ni dormahako gital pay scale-o aro GHADC-ni secretary-ko ra•galchinasa dabie kamtangtangko ka•na jechakangkuaha.
“GHADC-o kam ka•enggiparangna gital EC ka•sachakenba, salgittamni gisepo kam ka•pilchina ge•etanikoba ra•pilaha aro May-ni 10 tarikoba uamangko okame agangriktaiahachim indiba ia changoba uamang, chingni mol•molaniko ra•chakna jechaktaiaha,” ine GHADC-ni deputy CEM parakataha.
Indake ong•engon, GHADC-ni ning•o donggipa finance department-ni u•iatani gitade, GHADC-ni treasury-o da•o gong 96,30,738/- tangkarangsan dongaiaha aro GHADC-o kam ka•giparangna gitcham pay scale-o jabongani dormahako on•na CEM ku•rachakahachim aro uamangni dabienga gita Fifth Pay Commission-koba GHADC-ni treasury-o tangka paisa dongkaljokon on•na ku•rachakengachim ine Marak talatangenba, da•o dipet GHADC-o kam ka•giparang EC-ni agananiko ra•na jechakengkua ine Marak parakataha.
