Tura, Oct 27: West Garo Hills a•jani archaeology na mingsinggipa biap Wadagokgre songo drae songdong a•chaani bidingo badi ka•anio da•alonaba sorkarini mamung jaku de•anirang dongkujanina adita bakrimgimin GSU, FKJGP, ADE aro AYWP dolrang sorkarini kosako matnanganga.
Ia dolrang uamangni press na uiatanio sorkarini gisik nangbregija dakanirangko jegalan baksa suk onggijanirangkoba parakangaha.
Wadagokgre songo daalo nokking 300 bate drae songdonganirang donga ineba uamang janapangaha. Ia biapara Archaeological Survey of India (ASI) ni ningo gaaka aro gesa archaeological biap ine changimin onga. Ia biapni wilwilao songdongkamgiparangni ia biapko gamchate ragenchimoba drae songdonganiara niamni apalo onga aro ia drae songdongegiparang pukka nokrangkoba riktokaha ineba ia dolrang see uiataha.
Song wilwila jolo songdongkamgiparang ia biapo songdonggenchimode sorkari uamangko ruutgijan taraken rikgale galgenchim indiba daalo ia niamni apalo napdrae songdonggiparangni kosako sorkari mamungkoba dakjaenga ineba uamang matnangangaha.
Iandakgipa obostarangni a•dokko nosto ong•ataniko niksoen uamang CAA ni kosako raken jegalaniko dakachim ineba uamang janapangaha.
Garo Hills ajani bako Achik jat onggijarangni songdonganiko Sixth Schedule and Land Transfer Act, 1971 champengani dongachim ineba ia bakrimgimin dolrang aganangaha.
Ancient Monument and Archaeological Site and Remains Act, 1958 ni section 20A chelchakgimin biaponi metre 100 chelaona kingking mamung nokjamko rikna manjachim ineba uamang aganangkuaha.
ASI aro Mamong Sorkari mangba President ni 29.03.2010 o rachakgimin Ancient Monuments and Archaeological Sites and Remains (Amendment and Validation) Bill, 2010 ni Section 20A ni ningo iandake chelchakgimin biaprangode Expert Advisory Committee ni rachakanirangko manesa jedakgipa choa rikani kamrangko kana ba abachengna mana, indide maina Meghalaya adokara iani kosako jaku dena jamachakenga ineba uamang singdoangaha.
Adok Sorkari ia biapko aro Achik jatni aako chelchakna taraken jaku dena nangchongmota ineba uamang janapangaha.
Itihasnigita gamchatgipa badita dot rongterangko ragalmanenggnok uako darangba uija aro pangna bilsian chi bananirangko pasike Garo Hills ona napdrabaanirangko sorkari chelchakna mamungkoba dakja ineba ia dolrang parakangaha.
Sorkari taraken napdrae songdonganirangniko champengna aro Wadagokgre songko napsragiparangoni chelchakna kamko kajaode jingjengatanirangko dakanggen ineba kamikkenatangaha.
Translated by Neenah A. Sangma
