Boko, July 4: Mikkarang dontongpilgija jimbee waani a•selo, Assam a•dokni dingtang dingtang bakrango chi ban re•ani ong•angaha.
Iani gisepon, Chaygaon-ni MLA Rekibuddin Ahmed aro unbaksana, Goraimari Circle Officer, Samir Choudhary, Goraimari Police Station-ni OC, Bhagawan Deka, PWD, Health-ni aro gipin mongsonggipa officialrangni dongpaanio, Kamrup a•jani Goraimari jolrango chi ban re•anio nangchakea man•gipa biaprangko nirokaniko dakangaha.
Ia chi bananio dam 40 songrango bilongen nangchakeaha aro ia songrang bang•batan Brahmaputra Chibima sepangjolo donggiparang ong•achim ine Goraimari Circle Officer, Samir Choudhary parakataha.
District Administration-ni u•iatani gita de, Kamrup a•jao dam 281 songrang ia chi bananio nangchakeako man•ahachim.
Chi ban re•anio Goraimari jolrango nangchakea man•gipa dam 40 songrangona, Bristibar saloni dipet 1020 quintal mangni gita matburungrangni cha•aniko on•atronggnok ine MLA Rekibuddin ku•rachakangaha.
Una agreba, health department-ni gita medical health camp-rangko, mongsongbate bi•sarangna nangchakea man•gipa biaprango songchinaba ua didiataha.
Indake songni manderang uamangna ringani chirangko on•chinaba MLA-o janapatahani gimin uamangna tube well-rangko tarie on•aba ku•rachakangaha.
Brahmaputra Chibimani jangchio ga•akenggipa Batahidia Gaon Panchayat-ni ning•o ong•enggipa songrango janggi tangenggipa manderang neng•nikaniko chagronggenchimode, uarangnaba district administration mikrake dongenga aro SDRF aro NDRF dolrang bakan uamangko jokatna re•bagen ineba MLA Rekibuddin janapangaha.
Kamrup District Administration-ni parakatani gitade, Kamalpur-o dam 45, North Guwahati-o dam 26, Chamaria-o dam 28, Kayan-o dam 12, Rangia-o dam 16, Hajo-o dam 72, Goraimari-o dam 40 aro Palashbari-o dam 42 songrang chi ban re•anio nangchakeako man•aha.
Na·simang ia video-koba nina man·gen:
Na·simang iakoba poraina man·gen: Kaziranga National Park-o chi ban re•engon naljokatgipa dolrang matburungrangko jokata
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
