Guwahati, April 4: India-ni salgro-salaramo donggipa Arunachal Pradesh a·doko China a·song, uamangni bakan ong·a ine a·kangtaipilaniko dakenba, biap dam 11-rangko China a·songni ra·chakgimin biap ba a·ani bimingrangchi minganiko gittamgipa changna parakataha.

State Council-ni ge·etaniko man·e, ua ra·chakgimin biap ba a·ani bimingrangko China-ni Ministry of Civil Affairs, mija April 2 tariko parakataniko nikna gita man·enga. Uandake, Arunachal Pradesh-ko Tibet-ni salgipengchipakgipa bak ‘Zangnan’ ine China a·kangangaha.

Arunachal-ni biap dam 11-rangko an·tangtangni ine a·kange biming minggiminko mija Robibar salo ministry-chi parakatanio, Arunachal Pradesh a·dokni a·a damgni, manderangni dongenggipa biap damgni, a·bri-a·kongraragipa biap dambonga aro chibima dilgnirangko man·chape China a·songni ning·o napchapataha, ine koboroniko knasona gita man·enga.

China-ni Civil Affairs Ministry-chi ua a·kangenggipa a·a ba biaprangko biming donaniko gittamgipa chang ong·e ianpak parakataniko nikna man·enga. Iana skang, Arunachal-ni damdok biaprangko biming donaniko China a·song batanggimin 2017 bilsio parakatchengani ja·man, 2021 bilsioba dam 15 biaprangni bimingrangko gnigipa changna parakattaiahachim.

China a·songni iandake, Arunachal Pradesh a·dokni mitam bakrangko a·kangenba biming mingdapaniko India a·songba raken jegalatskaengon, Arunachal a·dok skangonin India-ni bak ong·baenga aro pangnan ong·angkugen aro ua biaprangko biming mingjitanichi maming dakeba India-ni bak ong·aoniko dingtanggrikatna man·jawa ine a·kangangskaaha.