New Delhi, Nov 18: Adita ge cholgugarang gita salgro-salaram a·jani gipin a·dokrangona aro Assam-ona niam gri dake silchidarerang aro gulli-barutrangni China a·songchi sokbaroroenganio ian a·jolni naljokanirangna namen kenchaksoani gnanggipa chanchina nangani ong·a ine intelligence agency-rang parakaha.
Songsul a·song China-chini niam gri dake sokbaenggipa gimik ge 423 silchidarerangko, jeoni AK-47-rang, M-16-rang aro Chinese pistol-rangko man·chape ia bilsion salgro-salaram a·jolrangoniko man·aha.
Koborrangko knasoani gitade, Myanmar sima-ari jolo nama damo uarangko palna man·ani gimin China a·song, salgro-salaramni dingtang dingtang bobil dolrangna iandakgipa silchidarerangko sokatenga ineba intelligence agency-rang talataha.
“Salgro-salaram jekai, Assam, Manipur, Nagaland aro Mizoram-oni mongsonggipa bobil dakgiparang China a·songni intelligence agency-rang baksa kobor donggrikenga, indaken China-ni silchidarerangchi aro uamangni on·gipa boksisrangchi uamang bang·a namgnirangko man·enga ine agency, sorkarina mikrakataniko on·aha.
Salgro-salaram jolo bobil dolrangna skie ranta ka·aniko on·ani, silchidare aro gulli-barutrangko sokatani aro bobil doloni a·rika man·giparangko aro dilgiparangko nokchakanirangan India-ni kosako bobil dake chakatatanio songsul a·song China-ni mongsonggipa kam ong·baenga, ine intelligence agency-rang jaksi otaha.
