Tura, Jan 18 : Ia bilsini Meghalaya Civil Services (MCS) porikka seanio, South Garo Hills a•jani diltubegipa song Chokpot Dura Banda-ni Chingba Jimbe Ch Marak, an•tangko on•kanganichi, rake kamko ka•ani aro gisiko bringbrangatanirangko gelna man•anichi chubatgipa gadangko man•e chu•sokaniko man•aha. Uni ia chu•sokaniko man•aniara dondikgija jotton ka•anichi miksongatangko man•a gita ama ine dakmesokani ong•aha.

MCS porikkani result-ko parakatani adita kontarangni jamano Chingba-o sing•anirangko dakon, dondikgija jotton ka•anian uni mongsonggipa bil ong•a ine aganengon, ua jinma baksa salrangko re•ataniko gale uni pilak somoirangkon poraianina jakkalskaenba miksongatangko man•a jotton ka•angaha. Chu•sokaniko man•a gita on•kanganiko nanga aro ua on•kanganiko dakna pangnan kusi ong•aia inenba ua katchaa gnang ka•dingsmite aganchakaniko dakangaha.

Chingba, sak 5 ba•rimarangoni chonbatgipa, an•tangni ma•a pa aro sakgni school-ni skigiparangni una lekka pora bida aro niamko jarikani gamchatani gimin skie on•ani a•selsa ia chu•sokaniko man•aha ine bebe ra•aniko parakataha. Uni pagipa, Semrongsing A Sangma aro ma•gipa Joshline Ch Marak, uni neng•nikbegipa re•mikkanganio chakpaaniko on•angaha.

Uni re•mikkanganiara altubegipa ong•jachim, 2022 bilsio, ua UPSC Civil Services Preliminary Exam-o chu•sokaniko man•e, mongsonggipa porikka seanio 37 mark mangmangna sirikahachim. Iandake ong•genchimoba, ua ka•donganiko watgalgija jotton ka•e MCS porikkana tarisamsoaniko dakmiting somoio State Secretariat-o Lower Division Assistant-ni kamko ka•angaha.

2018 bilsioni ua civil services porikkana tarisamsoaniko a•bachengataha aro chang 6 UPSC porikka-rangko see niaha. Porikka sea changantian una gamchatbegipa skie on•anirangko dakangan baksana chu•sokaniko man•a gita uni miksonganiko mangrakbatatna dakchakaha inenba Chingba janapataha.

Ua an•tangni rake kamko ka•ani namgipa biteko man•angaha. MCS porikka seanio nambatgipa sak 5-rangoni ong•na krengani uko nambatgiparangoni skanggipa gadangko man•a dakchakaha. Uko sing•aniko dakon, Chingba uni ka•singipa aro chanchibewale aganchakanirangchi manderangni gisikko salangaha.

Neng•nikani somoio ong•enga obostarangko maikai namatna gita kamko ka•gen ine uo sing•aniko dakon, ua ong•enga obostarangko ka•sinatna aro niamrangko ja•rikna nangchongmotani gimin aganangaaha. Agangrikani bilongen nangchongmotgipa ong•a. Ong•enga obostarangko namatna gita manderang aro dolrang baksa agangrikanian mongsongbatgipa chol ong•a, ine aganchakaniko on•enba ua an•tangni dilgipa ong•na kraaniko mesokangaha.

2013 bilsio, SSLC porikka seanio top 15-gipa biapko man•aoni uni re•mikkangani a•bachengangaha. Ua Uttarakhand-ni Roorkee aro Noida-ni Sharda University-o poraianiko dakangaha. Postgraduate poraia matchota jaman ua North Garo Hills a•jao Bajengdoba-ni Riverside Academy Adventist School-o skigipani kamko ka•angaha.

Uni jotton ka•ani aro chu•sokgijaniko man•aoniko skie ra•anian una chu•sokaniko on•aha ine aganengon, ia porikka seanirang ua maiko masia ukosan nia ong•aija indiba uni cholon bewalkoba nianiko dakaha, ineba Chingba janapataha.

Na·simang ia video-koba nina man·gen:

Na·simang iakoba poraina man·gen: Tura-ni College of Community Science, Umiam-o National Symposium-ko ong•atenga

India A·songni Salgro Salaram A·dokni gitalgipa koborrangko ma·sina sikode na·simang hubnetwork.in, oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub

Youtube channel- www.youtube.com/@NortheastMediaHub2020

Instagram- https://www.instagram.com/ne_media_hub