Tura, Mar 15: Chokpot-oni Baghmara-ona dakanggipa ramako tarienggipa company, name kamrangko ka•jaengani a•sel ia ramako tariani namsrangjaenga ine NGCO southern zone parakatenba, ia rama tarianiko name nirokchina gita South Garo Hills a•jani officer-rangko didiataha.
NGCO southern zone-ni president Arjun Marak-ni parakatani gitade, Chokpot-oni Baghmara-ona tariangenggipa ramako uamang nina re•angon, ia ramako tarienggipa company, name kamko ka•jaengani a•sel ramako tarianirang namsrangjaenga ine nikna man•ahachim.
Indake ong•engon, A•chik a•songni namgnina aro mongsongbate South Garo Hills a•jao songdongenggipa manderangni namgnina, ia rama tarianirangko Chokpot PWD-ni SDO an•tangan re•rurae nirokna nanga ine NGCO dabiangaha.
