Tura, June 11: Songsalo cholgri ong·gipa manderangna aro mongsongbate ma·giparang, dambe me·chikrang aro bi·sarangna on·kange kamrangko ka·na gita India a·songni salgro salaram jolo kuligipa Missionary Sisters of Mary Help of Christians (MSMHC), Centre for Development Initiative (CDI)-ko a·bachengataha.
Ia MSMHC dolara, sorkarini maming dakchakanirangko man·jaenggipa manderangna dangdike on·na gita Societies Registration Act 1860-ni ning·o biming segate kuligipa dol ong·a aro ia dol, CDI-ko songsalo cholgri ong·gipa manderangna kam ka·aniko namdapatna, kamrangko skie on·na aro cholrangko mesoke on·na gita a·bachengataha.
Ia CDI-ni vision ba niksamsoe kam ka·aniara, manderangni kakket aro ka·saani gunrangko ja·rike janggi tanggipa songsalna kang·kare kae kam ka·anian ba dangdike on·anian ong·enga.
Ia CDI da·o dipet, India a·songni salgro salaramo donggipa damdok a·dokrang, chong·motan Assam, Meghalaya, Tripura, Nagaland, Manipur aro Mizoram a·dokrango manderangni janggi tangani gadangko tang·doatna gita kamrangko ka·enga aro ia damdok a·dokni ning·o donggipa dam 15 biaprango, neng·nikanirangko man·e janggi tangenggipa aro cholgri apgri manderangna dingtang dingtang dakchakani cholrangko on·e kamrangko ka·enga.
Dingtang dingtang neng·nikanirangko man·e janggi tangenggipa manderang, jekai sakgipinni nokrango kamrangko ka·e cha·gipa, a·dok gipinoni re·brange kam ka·e cha·gipa, songadam nokadamni me·chikrang, HIV/AIDS man·giparang, drug addict ong·giparang, randi me·chikrang, butchumarang, cholgri ong·e galchipako man·giparang aro uandake neng·nikanirangko man·e janggi tangenggipa me·chikrangna pilak nanga dakchakanirangko on·na aro uamangni man·gnirangko on·na gita ia CDI, on·kange kamko ka·enga.
Ia CDI-ni ning·o, sorkarini dingtang dingtang cholrang aro nangchongmotgipa lekkarang, jekai E-Shram card, Aadhar card, Ration card aro uandakgipa dakchakanirangkoba cholgri me·chikrangna tarie on·na gita kamko ka·enga.
Cholgri ong·gipa bi·sarang, jekai ramarango donge jabolrangko kolamgiparang, sakgipinni nokrango dongnape kamrangko ka·enggiparang, bilsokkujaonin hajira ka·atako man·giparang, ma·gri pagrirang aro uandakgipa bi·sarangnaba ia CDI, pilakni gitan kamrangko ka·e on·enga.
