Shillong, Oct 21: A·dokni Skotong Minister Pa Conrad K Sangma mijalo chonchongipa ATM rang ko Main Secretariat ni Yojana Bhavan-o Community & Rural Development Minister Pa Hamletson Dohling ni dongpaanio oprake on·e songo noko bank ni kamrangko ka·gnigipa Business Correspondence Agent-rangna sualangaha.
Chongipa ATM ara jako rabite jakkalna man·gipa ong·a jekon songnokrango bank ni kamrangna mongsongbate tangka okanio BCA jakkalanggen. Ia jakkaltobegipa ja·kuko Meghalaya Rural Bank(MRB) aro National Bank for Agricilture and Rural Development (NABARD) baksa bakrime Meghalaya State Rural Livelihood Society (MSRLS) ra·baenga.
MSRLS ia bilsini June jao MRB baksa nangrime BCA ni project ko a·bachengatna MoU ko soi kae ra·ahachim. Dol 84 Self Help Group rang jean MRB ni ning·o kamko ka·engachim aro ‘bank sakhi’ dakeba kamko ka·engachim uarangko BCA dake donatskaaha.
Skotong Minister ia chongipa ATM-rangara bank ni nangchongmotgipa kamrangko songnokrangona sokatgnok jean songni nokni manderangna namen altuae dakchakbeani ong·gnok ine aganangaha. Chongipa ATMrangara songnokrangni cholgugaona bank ko ra·anganian ong·a ineba aganaha.
Bank rangko rikanirang komiani a·sel songnokrango tangka paisa oke chipe jakkalanirango aro ma·manti bank ni kamrangko chel·e re·na dona neng·nikanirangko man·e man·gnirangko ru·utatengachim uarangko Skotong Minister janapenba songnokni manderangna ia chongipa ATMrang namen dakchakani ong·gnok ineba aganangaha.
Bank ni kamrangna bang·a a·dokrang baksa Meghalaya a·dokba neng·nikanirangko man·engachim uni gisepon ia chongipa ATMrangko oprake on·anganiara manderangni salantio janggi tanganikoba ra·dojolani ong·a ineba Skotong Minister aganangaha.
Ia oprake on·angani ja·kuko ra·anio Skotong Minister aro C&RD Minister a·dokni dingtang dingtang biaprangoni BCArangna chongipa ATMrangko sualangan baksa nanggipa dilgiparangko iandakgipa jakkaltobegipa kamrangko aro ja·kurangko sokangkugijagipa biaprangonaba on·dapna jotton ka·angchinaba didijolangaha.
(Translated by Neenah A. Sangma)
