Shillong, March 13: Riatsamthiah-ni Church of Jesus Christ giljani manderangni segipa, tarigipa ming 13 mang donggipa “Jingjop”, ingipa ge·sa music album-ko giljani saksa a·gipi Pastor Iashan Rynthathiang, Sombar salo Shillong Press Club-o tom·aniko ong·atenba manderangna a·bachengate on·angaha.
Ge·gni music video-rang dongchapgipa album-ni gimin Pastor Rynthathiang-ni aganangani gita, ‘Jingjop’ ba ‘Cheani’ album-ko ong·katatna gita batanggimin 2011 bilsionin kamrangko ka·chakataha ine parakatan baksa, ia album-o Khasi jatni gitni sulrang, gam·anirang aro doka-damani bewalrangko jakkale tariaha aro ia album-ko music ba doka-damaniko ka·tong baksa nangdimatna miksonge tariaha ineba ua agandapataha.
“Git mingantion uni dingtangteani gnang, Nokgipa Isol iako chingna on·aha aro chinga ia gitrangko indaken asongaride seaijaha ine talataniko on·angengon, Isol-ni dongpaani baksa giljao chingni ring·mittelaniko dakmiting somoiosa ua gitni kattarang chingona nabaaha aro uandake chingni jinma bakrime ia album-ko ong·katatna kamko ka·ahani gimin, ia album-ni git mingantian orto gnang,” ine Pastor Rynthathiang parakataha.
Ia gital ong·katatgipa album-ko, Spotify, iTunes, Amazon Music-rango stream ka·na gita man·gnok aro music video-rangkoba Giljani YouTube Channel-oniko nina gita man·gnok.
