New Delhi, Dec 14: Meghalaya a·dokni Chief Minister Conrad Sangma a·songni Prime Minister aro Finance Ministerko gronge Meghalaya a·dokni nanga kamrangna agan-golporimaha. Ua gronganirango ma·mongni ministerrang ka·dongsona man·gni kattarangko aganaha ine CM Conrad parakaha.

Prime Ministerko gronge, a·dokni namroro-silroroanina dingtang dingtang kamrangko ka·engani bidingo aro ua kamrang maidakgipa gadangona sokengaha, Conrad che·em che·em talate on·aha. A·doko ma·marikkit kamrangko ka·enganiko mesoke aganon Prime Minister kusi ong·aniko parakaha.

Prime Minister-ni dingtangmancha namnikania Meghalaya a·doko namroro-silroroanina tangka-paisa chame jakkalanio tang·dobatbeani gimin ong·aha, maina uan bilsi dokna skang jedake ong·achim una chang 3mang bariaha.

Re·baenggipa bilsi bongani gisepo a·dokna kam ka·na manchisoanirangkoba talate agane, uarangko chu·sokatna ma·mong sorkarini dilani aro dakchakaniko on·angkuchina Prime Minister-na agan-janape mol·molaha.

Shillong songjinmao mande jelbra-jelsuani namen batahani gimin songdonggiparangna biap bicham chakjaengaha, gari gora jakkalanio rama changketaha, uni gimin, gital biapona Shillong jillako apalatna aro uko chalaina gitalgipa secretariat aro nanggipa opisrangkoba kulina miksongani giminba Prime Ministerna talataha. Uarangko chu·sokatna gita dakchakna kusi ong·aniko PM Modi aganchakaha.

Prime Ministerko grongani ja·man joljolan a·songni Finance Minister Nirmala Sataraman-ko gronge, Capital Investment Fundni gita dingtang dingtang a·dokrangna ma·mong sorkarini dakchakenganio Meghalaya a·dokni name dakenganiko aganaha. Badiaba a·dokrangnade ma·mong sorkarini gita badiaba projectrango tangka-paisa dakchakaniko bariatna man·gija donako janape, Meghalaya a·dokde name dakengani gimin dakchakaniko bariatkuchina gita CM Conrad agan-janape mol·molaha.

Finance Ministerko gronge golpoanio ka·donganiko man·aha, maina ua pilak talatanirangkon knachake dakchakaniko on·na kusi ong·aniko parakaha ine CM Conrad aganaha.