Shillong, Aug 25: Chief Minister gitcham Salseng C. Marak a·doktangna kam ka·e baltigiparangni gisepo nambatsranggiparangoni saksa ong·a. Uni janggi tangani bon·kamgipa bakomangba ua a·dokna dal·bea namgniko dake siangaha.
Politicsni bidingo srongsrong ong·ani gimin Salseng C Marak-ko “Mr. Clean” ine mingkalaka. Uni bon·kamgipa salrango saon ua India a·songni ba gipin a·songni namnamgipa hospitalrango donge sana-bananiko ra·na man·genchim, indiba ua Tura Civil Hospitalosa dongna tik ka·aha.
Ua a·dok sorkarini chalaigipa hospitalon ka·dongchake sana-bananiko ra·na namnikaha. Uni indonga kamara sorkarini chalaigipa hospitalrango manderangni dongna jajaaniko chel·atna baksa hospitalo kam ka·giparangni gisik ka·tongrangko bilkadapatani ong·gen ine u·ina man·a.
Uni indonga ja·kuko a·dokni Health Minister Ampareen Lyngdoh nikgija ong·jaha aro uan Tura Civil Hospitalna namgipa ong·ani certificateko on·e donanga gita ong·aha ine aganaha.
“Chingni gamchatnike ra·anide Tura Civil Hospitalo Mr. Marakni sana-bananiko ra·anian ong·a. Ua ramramgipa mandeni gadango an·tangko donna man·gipa ong·a. Uni bon·kamgipa salrangona kingkingba ua a·dok sorkarini chalaigipa kamrangko watgaljaha” Ampareen Lyngdoh assemblyo aganaha.
Salseng C Marak hospitalo dongmitingo maming nangdapanikoba dabijaha aro hospitalo kam ka·giparang jeko dangdike on·a ukon chu·ongnikaha. Ua an·tangko Chief Minister gitcham gita ra·gija ramram mande gitasan ra·aiaha.
CM gitchamni dakmesokangani ja·manan apsan dakgipa dakmesokaniko nikaha. Uni siani ja·mano da·o ong·enggipa Chief Minister Conrad K Sangmaba Sukrobar attamo Shillong Civil Hospitalo sana-bananiko ra·na dongeaha. Conrad walgimikan hospitalo tuaha aro ua scrub typhus aro typhoid saa ine u·ina man·aha. Sonibar salo uko hospitaloniko watataha indiba ua sana-bananiko ra·kuna nanggen.
Ia Marak aro Sangma Chief Ministerrangni dakmesoka kamranga sorkarini chalaigipa hospitalrango manderangni ka·dongchakna man·aniko bilakdapatgen. Indiba, uni gisepon, sorkarini chalaigipa hospitalrangko ta·raken nambatatna nanggen ineba niksoskaa, maina indakgipa hospitalrango sana-banani bosturang, samrang aro namnamgipa specialist doctorang namen komia ineba nikna man·a.
Na·simang ia video-koba nina man·gen:
Na·simang iakoba poraina man·gen: South Garo Hillso desaron sakgniko drae til·eka
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.co
Instagram- https://www.instagram.com/ne_media_hub
For news & updates, Download Hub News App from Google playstore
