Imphal, April 30: Manipur a·dokni skotong minister Pa N Biren Singh-ni programna tarisogipa biapko ma·sina man·gijagipa manderang nosto ka·e wa·al so·chipani ja·man, Manipur-ni Churachandpur a·jao re·anggipa anti Sukrobar saloni Internet service-rangko dontongata baksana, Section 144 CrPC-ko ra·gatangaha.
Koborni gitade, Pa Biren Singh, ua biapona gym aro kal·susana tarichakgipa biapko oprake on·na gita re·angani ong·achim. Indake ong·engon, obostarang da·o ka·sinpilahaoba, jajrengna nanganirang dongkuani gimin aro a·bachenggipao obostarang namjabatroroangani gimin, Churachandpur administration a·ja gimikon chel·chakgipa dolrangko bing·tipe donataha aro mande sakbongana bate tom·dakaniko aro jako habi-jabi bosturang ra·bitanikoba champengataha.
Ua obosta ong·angani gimin sing·anina, dos dakgiparangni kosako chinga sinjetanirangko on·chongmotgen ine Manipur-ni skotong minister Pa Biren Singh aganangenba, uni anniversary-ko manijola baksana gym-ko oprake on·na gita chingni MLA-rang manchisoa dongachim, jekon mitam denggu dakgiparang gym-ko nosto ka·aha aro ian constituency-ni ning·o ong·gipa mamlasa ong·a ine ua aganchakangaha.
Ia obosta ong·anggipani bidingo ge·sa video-o niksona man·ani gitade, Sukrobar salo skotong minister-ni programna tarisogipa biapo donenggipa chokkirang aro minggipin bosturangko mande jinmani dokchichie nosto ka·anirangko nikna man·aha. Unbaksana, kulidaldalgipa gym-o donenggipa kal·susaani bosturangkoba manderang wa·al so·chipe donangaha.
Ia so·so-jengjengko, a·dokoni chibolrangko aro a·kanggimin buring-bolgrimrangko Bharatiya Janata Party-chi rikdilenggipa sorkarini survey ka·aniko jegalenggipa Indigenous Tribal Leaders’ Forum dakdilaha ine knasona gita man·enga. Ia apsan forum-an adita salrangna skang, Manipur a·dokoni adita ge gilja nokrangko pe·e galani giminba sorkarini kosako matnangangahachim.
