Shillong, May 16: Coffee aro cocoa-rangara gama ge•anio gamchatbegipa bosturang ong•ani gimin ian songo noko manderangni janggi tanganiko dingtangatna aro game ge•e cha•giparangna pangkamgipa janggi tangani cholko on•na man•gen ine Meghalaya a•dokni Soil & Water Conservation Minister Marcuise N Marak parakataha.
Marak-ni parakatani gitade, adita salrangna skang uni West Garo Hills a•jao donggipa Dura Kalakgre songona re•anganio ua Soil & Water Conservation Department-ni coffee baganrangko niangjolaha aro ia coffee baganrangni dal•roroenganiko ua nikangaha.
“Ia gamchatbegipa gama ge•ani bostuara mandeni ringna jakkalgipa bostusan ong•ja indiba gama ge•e cha•gipa manderangni janggi tangniko dingtangatna man•gipaba ong•a,” ine Marak aganaha.
Iani bidingo kobor ra•timgiparangna talataniko on•angengon, Meghalaya a•doko coffee-ko da•o a•dokni pilak biaprangon ge•tokengaha aro coffee bagan dakanio department-ni miksonganiara man•dapaninasan ong•aigija samtangtango ong•telaigiparangko chel•chaknaba ong•enga ine Minister aganaha.
Dura Kalakgre songara Tura-na chiko on•enggipa Ganol chibisikni bakan ong•ani gimin ia biapo coffee bagan dakanichi chibisikrangko chel•chakna dakchakani ong•gen ineba ua aganaha.
Ia coffee project-ko Soil & Water Conservation department chalaienga aro ia kamo Agriculture, Horticulture, Forest, MDMA, and C&RD department-rangba jak on•enga ineba Marak parakataha.
Aguragre songonaba Marak, cocoa baganko nina re•angaha aro ian game ge•e cha•giparangna mingsa nambegipa janggi tangani chol ine ua aganaha.
Marak-ni parakatani gitade, a•doko ge•enggipa cocoa-rangko gipin biaprango bang•en am•tokenga aro iano Cadbury company-ba gisik nanganiko mesokaha.
Cocoa baganrang silengaha ine janapatengon, mitamrangde ge•aoni bilsi gittamni gisepon bite nangna a•bachengengaha ine Marak parakataha.
Ia cocoa baganko manderangni acre 5-6-mang ong•gipa a•ao dakenga aro ia baganko da•o dipet uni department nirokenga ineba ua aganaha.
Cocoa-rang name dal•ahaon, iako game ge•e cha•giparangna pakwate on•gnok ine janapatskaengon, ia bagan dakanio chu•gimik korosrangkon department-sa gamaha ine Marak parakataha.
Na·simang ia video-koba nina man·gen:
Na·simang iakoba poraina man·gen: Mande palbadingani aro gipinrangko champengna Assam niamko taria
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Instagram- www.instagram.com/ne_media_hub
