Shillong, Oct 8: Meghalaya a•dokni Coke karkanarango Metric Ton (MT) 25,000-na bate coke-rangko tarienga ine Elaka Sutnga-o donggipa Environment Coordination Committee (ECC)-ni RTI ka•e sandianio man•aha ine a•kanganiko Meghalaya a•dokni Forest & Environment Minister James Sangma jegalataha.
“Da•o dipet ia coke karkanarang dongimin niamna bate coke-rangko tarienga ine RTI ka•e man•gipani giminde anga maming kobor dongja. Meghalaya State Pollution Control Board (MSPCB)-ni parakani gitade, ia karkanarangko nichenge aro karkanarango kam ka•anirangko nichengesa permission-ko on•aha,” ine Sangma parakataha.
Ia coke karkanarango niamrangko ja•rikjaenga ine matnanganirangko am•sandina gita songe on•gimin Expert Technical Committee-ni tom•aniko salgni skangsan ong•ataha indiba ia committee-ni changsa changgni tom•aianichide mamingkon sandie man•jawa ineba Forest & Environment Minister parakataha.
“Ia committee, niam gita re•ange am•sandianirangko dakani ja•man chingna report-ko on•ahaosa kakketkode ma•sina man•gen,” ine Sangma aganaha.
Uni ma•siani gitade, ia coke karkanarang, MT 25,000-na komibate coke-rangko tarienga ineba Sangma talataniko on•angaha.
