Tura, Sept 15: Tura Sangsanggre-o donggipa College of Community Science-ko nirokna bil on⋅ako man⋅gipa Dr. Pushpita Das-ni uni kam ka⋅gipako ong⋅gija jakkalsretaniko chakna man⋅jae uni kosako Womens Police Station Incharge-ona badi ka⋅aha.
Neng⋅nikanio ga⋅akgipa-ni aganani gita, uko security guard-ni kamnasa rakkiachim indiba Dr Das pilak nokni jamni kamrangkoba somoina batpile ka⋅ataha. Ma Sangma pring 4:30 bajirangon chakate pilak nokni kamrangko ka⋅an baksa uko pring attam malis ka⋅e on⋅a nangachim. Malis ka⋅mitingoba nagande an⋅chake on⋅an baksa agantogija be⋅enni bakrangkoba ka⋅atrongachim. Indake ia kamrangko ka⋅na jechakode Ma Sangma-ko kamoniko galna ka⋅mikenatachim. Gisikni sinjetaniko chakna man⋅teljaesa uni kosako badi ka⋅na nangao ga⋅akaha.
Da⋅ororo inadakgipa obostarang me⋅chikrangna ong⋅enganiko Mothers Union jera ra⋅aona ra⋅baan baksa security-ni kamo napanggipa me⋅chikna mikrakatani aro aganskie on⋅ani program-rangkoba mikkangchi on⋅angna nangchongmotaniko janapaha.
Kobor-na Mothers Union Tura-ni dilgipa Madam Sume-ni parakatanigita, gisiko sinjetako man⋅e neng⋅nikanio ga⋅akgipa me⋅chikma sakgnina kakket bichalko on⋅na nanga aro Dr Pushpita Das-ko kamoniko ra⋅galna nanga ine University-ni vice chancellor Internal Complaint Committee-ko bosaichinasa ge⋅etaniko on⋅aha indiba Dean-kon kamoniko ra⋅galchenggija ia mamla-ko am⋅sandiode, dal⋅batgipa gadango donge uni jak dongtelaigen ine nikna man⋅a. Unigimin ia mamla-ko Internal Complaint Committee gita ong⋅gija Local Complaints Committee-ni gita kam ka’china jeon District commissioner an⋅tangan chairman ong⋅e re⋅dilgen. Madam Sume-ni aganani gita, ia Dr. Pushpita-ni kosako badi ka⋅ani ja⋅manba rokom rokom sinjetanirangko aro ka⋅mikentanirangko on⋅kuengachim. Ia a⋅sel ong⋅aniko Assembly Committee of Womens Empowerment Ma Ampareen Lyngdoh-ba jegalatan baksa dongimin ain-ni ning⋅o segatna nanga ine dabiataha.
