Shillong, Jan 9: Meghalaya a·doko sak 12 Congress MLA-rangni All India Trinamool Congress (AITC)-o napanganiara ‘political suicide’ gitasa ong·aha ine BJP-ni state president Ernest Mawrie parakataha.
Mawrie-ni parakatani gitade, AITC dolara national party ong·ja aro Mukul Sangma baksana AITC-o napanggipa MLA-rangara national party-ni gitcham dilgiparangsa ong·ani gimin BJP gita dakgipa national party-rangosa napna nangachim.
AITC-o napangna skangba Mukul Sangma, BJP baksa bakrimani bidingo agangrikna gita NEDA-ni convenor aro Assam-ni Chief Minister Himanta Biswa Sarma-ko grongeahachim ineba Mawrie parakataha.
Assembly election-na da·o bilsisa somoi dongkuengani gimin uamang BJP-ni do·gako oe donenga aro AITC-o napanggipa sak 12 MLA-rangko man·chape je dilgiparangba BJP-ona re·bana man·aigen ineba BJP-ni state president parakataha.
Ia chang election-o AITC dolba uamangni bobil dolrangoni dolsa ong·gen ineba Mawrie agantaiaha.
Assam aro Meghalaya a·dokni simarango meligrikna man·jaenggipa biaprangko namatna gita kamrangko ka·engahani gimin ua MDA sorkariko mittelpilataha.
