Guwahati, March 21: Congress dolni ‘tol•pinapgipa’ ku•rachakanirangko bebera•jachina Robibar salo, a•songni Prime Minister Narendra Modi, Assam a•doko songdongenggipa manderangko didiangaha.
Re•anggipa Sonibar salo Congress dolni dilgipa Rahul Gandhi-ni Assam assembly election-na oprake on•anggipa manifesto-o Citizenship (Amendment) Act-ko Assam-o bon•atna aro lak 5 sorkarini kamrangko on•na ku•rachakani baksana Congress dolni ming bonga ku•rachakanirangko miksonge Prime Minister, ia kattarangko aganaha.
“Ma•mongo aro Assam a•doko sorkariko rikengmiting somoio Congress dol, kamrangko on•na aro me•chikrangna janggi tangani cholrangko tol•e ku•rachakaha. Bilko ra•sekna gita Congress dol jekoba dakna amaigen aro ian uamangni tol•pinapgipa ku•rachakanirangko mesokaniba ong•enga,” ine Prime Minister, Robibar salo Asom Gana Parishad (AGP)-ni president Atul Bora-na Bokakhat samba jolo election campaign-ko ka•engmiting somoio manderangna aganprakataha.
Assam a•doko BJP dol baksa bakrimenggipa dolrangoni AGP-ba dolsa ong•paengachim.
Assam a•doko tom•tomaniko on•na man•jaha aro niam gri napsrukanirang batroroataha ineba ua Congress dolko matnange aganangaha.
“Ma•mongo aro Assam-o Congress sorkariko rikaniara damgnion nichanggalani, damgnion tangka paisa jakkalsretani aro damgnion niam gri napsrukanikosa bariataigen. Indiba NDA sorkari engine ge•gnide namroro silroroaninasa apsan re•gen,” ine da•o bilsi bongani gisepo pilakni gitan namroro silroroaniko ra•bae on•na Modi ku•rachakangaha.
Assam a•doko songdongenggipa manderang, Assam sorkarikon nangnikpiltaiengani gimin Assam election-o BJP dol chegipa ong•piltaigen ineba Prime Minister aganaha.
Congress sorkarini somoio Assam-ni manderang, so•sojengjeng ong•anirang bon•changjawa ine chanchitokahachim indiba NDA sorkari, Assam-o tom•tomaniko aro namroro silroroaniko ra•bana man•aha ineba PM Modi parakataha.
Assam a•dokni Kaziranga National Park-o niam gri gondu so•otaniko champengna man•aha ineba ua BJP dolchi dilenggipa Assam sorkariko mittelpile aganangaha.
