Shillong, March 10: Congress aro AITC, re·baenggipa MP eleksino bakrime kam ka·na ja·ku de·enga ine koborrango niksoaha. Indiba eleksinko parakatna antisa somoi dongkuengon ua dolgnini gisepo, Shillong aro Turana candidateko mingani bidingo meligrikjae, tonual salokgrike dakgrikna am·a gita ong·skaenga.
Tura aro Shillongna MP candidaterangko Congressni mingengon uko AITCni dilgipa Dr. Mukul Sangma Sonibar salo meseng meseng katta aganataha.
Turani biapna AITC an·tangtang susana sikani gnang ine obostarangoniko nikatna man·enga.
“Chinga sengna nanga gita sengaha. Chingni chakchike sengako a·song gimikan nika ine anga chanchia. Chinga INDIA Blocni gita bil dondime apan candidatekon mikkangchakatna miksongachim, indiba ua ong·jaengaha” ine Dr Mukul Sangma aganaha.
Matnangania dolsaonisan ong·jaenga, maina West Bengalni pilak dam 42 biaprangon AITCni candidaterangko mingani gimin, AITC dol dakanio chanchirime tik ka·giminrangko pe·enga ine Congressni Jairam Rameshba matnangaha.
West Bengalo Congressba dam 12mang biaprangode amna ka·dongani gimin susana nangnikaha; Berhampore-o Congressni state president Adhir Ranjan Chowdhuryni ra·e dongenggipakoba man·pilkuna ka·dongani gnang. Ua biapko Congress 1999 bilsionin jakkipe dongna man·enga.
Tik ka·gimin gita ong·na nangaoni Congress dol aktete kataha ine mesoke Dr Mukul Sangma inaha: “Uamanga skang skang dake Meghalayana candidaterangko mingaha inara ong·jama? Meghalayao damgni seatrang gnang. Damgninan Congress an·tangtangni manderangkosa biming mingmanaha.”
AITCni nikaniode uamangan Turani Lok Sabha seatko Agatha K Sangmaoniko ra·sekna bil batenga. Ia ka·dongania batanggimin assemblyo eleksino cheanirangko niate ong·enga. Garo Hillso dam 24 biaprangoni AITC dam 4 biaprangon man·on Congress dolde damsa mangmangosan man·aiaha. Gambegreni MLA ong·enggipa Saleng A Sangmako da·o Turana Congress dol mingenga.
AITC aro Congressni gisepo andidatena susa-bada ong·engani kobor NPPrangnade knatobe gitni sul gita ong·skagnok.
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
