Shillong, Dec 19: Congress doloni ong•katanggipa a•dokni gitcham minister Ampareen Lyngdoh, Sombar attamo National People’s Party (NPP)-o napangaha aro uko NPP-ni national president aro a•dokni Chief Minister Conrad K Sangma baksana, Deputy Chief Minister Prestone Tynsong, Minister Sniawbhalang Dhar, NPP-ni state president Dr WR Kharlukhi aro gipin dilgiparang rimchaksoaha.
Lyngdoh-ko rimchaksona gita NPP-ni tom•aniko Laitumkhrah-ni Fire Brigade kal•chakramo ong•atangaha aro ia tom•anio Congress dolni gitcham MLA Mohendro Rapsang aro Narpuh constituency-ni UDP MDC Emlangky Lamare-ba NPP-o napangaha.
Ia tom•anio NPP-ni national president aro a•dokni Chief Minister Conrad K Sangma, tom•anio bak ra•giparangna aganprakengon, NPP-ona re•bagipa Ampareen Lyngdoh, Mohendro Rapsang aro gipin dilgiparangko rimchaksoenba, uamangni re•baaniara Shillong songjinmao NPP-ko bilakbatatani ong•gnok ine parakataha.
Ia tom•anio NPP-ni state president Dr WR Kharlukhi-ba aganprakengon, Dr Ampareen Lyngdoh-ko NPP-ni official spokesperson dake parakatjolaha.
NPP-o napani ja•man Ampareen Lyngdoh-ba jinmana aganprakengon, NPP-ni dingtang dingtang dilgiparangna an•tangni mittelpilaniko parakangenba, re•baenggipa 2023 bilsini Assembly election-o NPP-ko cheatna gita uni constituency-ni manderang rakbee kamrangko ka•gen ine ku•rachakaniko on•angaha.
Apsan daken Mohendro Rapsang-ba a•dokko re•dilanio a•dokni Chief Minister Conrad K Sangma aro NPP-o ka•dongchakaniko parakataha.
