Shillong, Oct 1: Congress dolni gipin sak 13 MLA-rang baksa ong•katgrima ine koborrango parakaniko Sukrobar salo, Opposition dolni dilgipa aro Congress Legislature Party (CLP)-ni dilgipa Dr Mukul Sangma jegalataha.
Delhi-oni Shillong-ona re•bapilani ja•man Dr Sangma-ni mikkango AICC-ni dilgiparang baksa kusi ong•gijaniko uni mikkango mesokahani gimin Mukul, Congress dolni adita MLA-rang baksa Congress doloni ong•katna sienga ine Sukrobar salo jangbingbanganirangko knasona man•ahachim.
Indake ong•engon, an•tangni kosako iandake matnanganirangko Dr Sangma jegalatenba, batanggimin somoirangoba uni kosako manderang apsan daken chanchichiptokaha ine parakataha.
“Kakketko agangenchimode da•o 2023 bilsini election-nasa chinga an•tangtangni dilgiparangko gipin dolrangni rime kataoniko champengna kamko ka•enga,” ine Sangma parakataha.
Ua an•tangko bebera•gijagipa ine mesokna sikja aro iandake uni kosako chanchichipaniara namen kragijani ong•a ineba CLP-ni dilgipa parakataha.
2018 bilsini Assembly election-na skang Congress dolni bang•a dilgiparangan doltangko wate katahani gimin an•tangni suk ong•gijaniko parakatengon, politics-ode ripengska ine chanani dongja ine Mukul mikrakataha.
“Ua somoio bang•a dilgiparangan cha•bokako man•e doltangko wate kattokaha aro uamangoni bang•batan amako man•riktokaha. Uni gimin iandakgipa neng•nikanirangko ta•rake namatna man•jagenchimode ian dilgiparangna dal•bea gimaani ong•a,” ine Sangma aganaha.
MPCC-ni gital president Vincent Pala aro CLP-ni dilgipa Mukul Sangma sakgnian New Delhi-ona re•angahaoba uamang baksa AICC maming chanchirimanirangko dakskajahachim.
Indake ong•engon, Pala aro uni gisepo meligrikgijanirangko namatna gita AICC-ni dilgiparang uko Delhi-ona okamatengani gimin ua Robibar salo Delhi-ona re•anggen ine Mukul parakataha.
