Shillong, Feb 17: A•dokni gita aro ma•mongni gitaba Congress dolo dilgiparang dongjani giminsa ia Assembly election-o ua National People’s Party (NPP)-oni susana draatako man•aha ine Sukrobar salo, PWD (Buildings)-ni gitcham executive engineer aro North Shillong constituency-o NPP-ni candidate ong•e susaenggipa Ransom Sutnga parakataha.
Sutnga-ni aganani gitade, ia election-o ua Congress dolonisa susana miksonganirang dongachim indiba Congress dolo dilgiparang dongjani gimin ua NPP-oni susana manchiskaaha.
Uni NPP-o susana manchianiara ong•akon dakaha maina ua Congress-oni susagenchimode cheani cholrang bang•e dongbrejachim indiba da•o ua NPP-oni susaengani gimin cheani cholrang una nambatengaha ineba gitcham engineer parakataha.
Gital rikenggipa Assembly building-ni protchong be•gruanina NPP-chi dilgipa MDA sorkariko Congress dolni matnanggipani gimin janapatengon, ma•mongoni re•baenggipa Congress dolni dilgiparang, maming nama kamrangkode ka•dilna changrongja indiba pangnan gipinrangko matnanganirangsa bataia ine Sutnga parakataha.
Assembly-ni protchong be•gruani a•selko IIT Guwahati-ni gita sandirokani ja•man, ian protchong agre jredugaani a•selsa be•gruaha ine report-ko on•manahachim.
