Guwahati, Feb 21: A·doko mongsonggipa Assembly eleksin ong·na da·o jagnirangsan somoi dongaiahao, manderangni salanti gitan jakkalenggipa petrol aro diesel torangni damrang tang·dopretengani gimino uko jegalenba Assam-ni Congress dol, a·dokni damanti district-rangon da·al Robibar saloni uamangni dingtang dingtang dakgipa jingjengatanirangko a·bachengataha.
A·dokni Congress dolo dilgipa ong·e kamko jako ra·enggiparangoni Ma·mongni minister gitcham aro AICC-ni General Secretary Pa Mukul Wasnik, Assam Pradesh Congress Committee (APCC)ni skotong dilgipa Pa Ripun Bora, Lok Sabha-ni MP-rang – Pa Pradyut Bordoloi, Pa Gaurav Gogoi, CLP-ni dilgipa Pa Debabrata Saikia, MLA Pa Rakibul Hussain aro All India Mahila Congress-ni ma·dot Ma Sushmita Dev-maang gimikan a·dokni dingtang dingtang district-rango jingjengatanirangko dakdilangaha.
“Manderangni jakkalenggipa petrol, diesel, LPG, me·su-samjakrang aro minggipin salantio jakkalgipa bosturangni damrang nangana batpile tang·doenganiko jegale dingtang dingtang dake jingjengatanirangko dakna miksongaha. Ia dol, an·tangtangko a·doko songdongenggipa manderangni ku·rang dake ra·enba a·dokni kona-noksik pilakchin dingtang dingtang dake jingjengatanirangko dakanggen. Dugapile kajinarangko sorkarini ra·enganirangko manderangna ma·siate on·angna chinga, iano pangchake jegalanirangko dakchina District aro Block Committee-rang gimikkon aganmanaha,” ine APCC-ni padot Pa Ripun Bora parakataha.
“Gipin gamdapanirangko changale, petrol toni komibatgipa damara litre prako gong 33.46 ka·e ong·enga aro dieselni komibatgipa damara litre prako gong 31.82 ka·e ong·enga, indioba, Assam a·dokni ramram manderangko petrolna litre prako gong 87 ka·e aro dieselna litre prako gong 82 ka·e gamdraatenga. Kajinarangni bimingo a·doko songdongenggipa manderangoniko BJP sorkari sekdrae ra·enga,” ine Pa Ripun Bora, da·al salo Hojai-o jingjengataniko dakango manderangna aganprakaha.
