Beijing, May 27: 2019 bilsini bon•angachibara China a•songo nikchenggipa Coronavirus-ni a•bachenganiko gital dake sandipiltaichina aganani gimin Bristibar salo China a•song, US a•songni president JR Biden Jr-chi dilenggipa sorkariko matnangataha.
Foreign Ministry-ni spokesperson Zhao Lijian-ni kobor ra•timgiparangna parakatani gitade, US a•songni president Joe Biden-ni iandakgipa ge•etaniko on•aniara, US a•songni kakketo bebera•gijaniko aro science-ni gita a•ning bite sandie man•anio gisik nanggijaniko mesokani gitasa ong•engachim.
Ia sabisiara Chinese laboratory-rangoni a•bachenggipa ong•ama ong•ja uko tale ma•sina man•na gita ia coronavirus-ni a•bachengbaaniko name sandipiltaichina gita US a•songni president, US-ni inelligence official-rangko ge•etangahachim.
US a•songni gitcham president Donald Trump-ko man•chape dingtang dingtang a•songni dilgiparangba ia sabisiara, China a•songni Wuhan-o matburingonikosa mandeo man•chenge a•bachengaha ine agananiko bebera•jae laboratory-rangonisa a•bachengahakon ine potchiptokahachim.
Indake ong•engon, science-ni bewalo ia sabisini a•bachengbaaniko sandirikkitanio China a•song baksa US a•songkoba World Health Organisation baksa bakrimchina Zhao, US a•songko didiatskaaha.
