Shillong, May 30: Meghalaya a•dokoba COVID-19 giproroenganichi bang•a janggirangan gimana nangengahani gimin ia sabisiko warachakanio chegipa ong•na man•na gita Robibar salo, dingtang dingtang toromni manderang, apsan bi•rimanirangko dakangaha.
Ia jinma bi•rimani program-ko Meghalaya sorkari ong•atangaha aro ia bi•rimanio a•dok gimikni manderangan noktangtango donge Nokgipa Isolni pattianina bi•angtokaha.
Ia jani gisepon Meghalaya a•doko changbonga batpile COVID-ko man•tokengahani gimin ia sabisiko warachakanio chegipa ong•na gita sorkari, dingtang dingtang toromni ku•cholsan ong•e bi•rimani program-ko ong•atangaha.
Noktangtangon donge ia bi•rimanio bakko ra•china sorkari didiatahani gimin a•dokni pilak biaprangon pilak toromni manderangan, nokdangtangtang baksa bi•rimangtokaha.
Ia bi•rimanio bakko ra•ahani gimin a•dokni Chief Minister Conrad K Sangma-ba dingtang dingtang toromni dilgiparangko aro a•doko songdongenggipa manderangkoba mittelpilataha.
“Ia bi•ani aro olakkianiara an•chingna namen gamchatbegipa ong•a aro anga bebera•a ia bi•rimanio bakko ra•anichi sakantian pattianiko man•aha,” ine Sangma parakataha.
Ia jinma bi•rimaniko ong•atani ja•man Meghalaya a•dokni Health Minister AL Hek-ba toromni dilgiparangko aro a•doko songdongenggipa mande sakantikon mittelpilangaha.
“An•ching mande ong•e ia sabisiko namatna warachakenga indiba an•ching Nokgipa Isolni pattiani gride maming dakeba chu•sokna man•jawa aro uasan an•chingko chel•chakna man•gipa ong•a,” ine Hek parakataha.
