New Delhi, June 15: Covid-19 sajinmani tikako su·ani ja·man jeba mandeni sianganiko aro biljime sae hospital-o sanna gita nanganiko uni a·sel ine ra·na man·jawa ine Ministry of Health & Family Welfare talataha.
Ministry-oni parakatani gitade, sajinmani tikako su·ani ja·man be·en biljime saani ba Adverse Events Following Immunization (AEFI) ong·aniko mittam koborrango knasona man·enga, jechin tikako su·ani ja·man sagiparangoni mitamde siaonaba sokpilengachim. Koboro parakatani gitade, mija January 16 tarikoni ia June 7 tarikona kingking sak kror 23.5 mang gape tikako su·anganichi gimik sak 488 manderangni sianganiara COVID-ni tikarangko su·anio nangchapeachim.
Iani bidingo, sabisiko champengna tika su·ani ja·man pilak samrangan manderango bang·a-bang·gija saanide dongtelaia aro manderangna ma·sisretatanirangko gipatna nangja ine NITI Aayog-ni member health, Dr VK Paul aganangaha.
Gimik pong kror 23.5 tikarangko su·anganio 0.0002 percent-ni gitasan Covid sajinmani tikako su·ani ja·man sianganiko segatrikaha aro iara a·songo mande jelani kri mandeni signi gitan ong·aienga.
Iani gimin seachi talataniko on·anggipao janapani gita, “Covid sabisina porikka ka·e saako rim·a man·giparangoni sianggipan 1 percent-na bata aro Covid sajinmani tikako su·achi ia sianirangko champengna man·a ine u·ina nanggen. Uni gimin, Covid sabisiko man·e sianggipana bate sajinmani tikako su·ani ja·man sae sianggipa namen komisranga.”
Tika su·ani ja·man manderangni siani, biljime saako hospital-o sanani ba be·enni bak kam ka·gijanirang ba jajrengna nanganirang ong·ode uarangko serious ba severe case-rang gita ra·a aro district-ni gadango sandiataniko dakna nanggipa ong·a. Causality assessment-rang, ba obosta ong·anirangara tikako su·ani a·selmanchama uko ma·sie ra·na dakchakenga aro iako a·dok aro a·songni gadangrango kamko ka·enga. Uni gimin district, state aro a·songni gadangrango AEFI-chi sandiataniko dake kakketko talchenggijade sajinmani tikako su·ani ja·man jeba mandeni siani, saa biljime hostpital-o dongna nanganirangko uani a·sel ine chana gita man·jawa, ineba janapatjolaha.
