By Norah Sangma
A∙gilsak gimiko da.o ong∙enggipa kenbegnigipa COVID-19 sajinma an∙chingni a∙dokoba salantian giproroaniko an∙ching niknagita man∙enga. A∙doko COVID-19 sajinmani batrikrikenganiko nike a∙dokni sorkari dingtang dingtang niamrangko ba cholrangko saksa sakgipinoni batrikrikaniko champengna gita ja∙ku de∙anirangko an∙ching batangimin salrango nikna man∙aha. Indake ong∙genchimoba a∙doko sabisini batroroani komijaenga ine an∙ching u∙ia aro mikrontangchi nikna man∙enga. Iako niatgenchimode ian songdongenggipa manderangni sorkarini dongimin niamrangko manijani a∙sel ong∙a ine an∙ching agana gita man∙gen maina bang∙bata manderangan bajar anti rango mask-rangko gantokjaenga aro saksa sakgipinoni chel∙tangrike dongjaenganiko an∙ching bang∙en nikna man∙enga. Un baksana manderangni simsakgija bajar antirango re∙ramanirangko aro COVID-na dongimin niamrangko pe∙aniko nikenga.
Sorkarini dongimin niam chong∙motan chu∙gimikgipa chipchange donaniba manderangko noktangtango nape dongchina didianiko dakgenchimoba sabisi man∙ani bang∙roroaniko an∙ching nikenga aro Garo Hills-ni a∙jaoba sak hajalna batple ia COVID sabisiko man∙e dongiparang gnang aro salantion an∙ching sia bon∙anirangkoba knaenga aro nikenga. Bang∙a nokdangrangan an∙tangtangni ka∙sabegipa ma∙drangrangko gimaatna nangao ga∙akaha. An∙chingni Health department-ni Principal Secretary Pa Sampath Kumar-ni aganani gita sorkarini dongimin niamrangko ja∙rike noktangtango nape donggenchimode ia sabisini batririkaniko champengna gita man∙genchim maina niatgenchimode an∙ching nikatna gita man∙gen, je dal∙dalgipa songjinma jekai Maharashtra, Delhi, Rajasthan aro gipin biaprango, re∙anggipa ja rango ia sabisiko man∙anirang bilongen bang∙ahachim indiba da∙alo ua biaprango manderangni noktangtango tom∙tom donganichi aro sorkarini dongimin niamrangko manianichi aditana kingking sabisini gipaniko champengna gita man∙aha. Uamangni indake dakanichi sabisiko man∙giparang komiroroanganiko an∙ching re∙anggipa salrango nikna man∙aha. Apsan daken an∙chingni a∙dokoba niamrangko ja∙rikgenchimode ia sabisiko champengna aro bon∙kame chena gita man∙gen ine anga bebe ra∙a.
Mingsa an∙chingni dakna nangnigipa kamara uan sorkarini gita indin on∙enggipa tika-ko su∙e ra∙na nanga maina ia tikako su∙anichi an∙ching ia sabisioni naljokataniko aro saksa sakgipinona batrikrikaniko champengna gita man∙gen. Ian an∙ching be∙en bimangko bilakdapatani aro sabisini jo∙ongko warachaksona ba dakgriksona gita be∙enko tarisamsogipa ong∙a. Beben ia tikako ra∙anichi an∙ching sabisiko man∙jawaha inede ong∙taija indiba ia tika-ko ra∙anichi adita naljokatanirangko on∙a ama, jedake an∙ching garirangko salengon helmetko gane rama jalango a∙sel ong∙anio sia bon∙aoniko champengna ba naljokatna ama, ua gita chacha ong∙a. Indiba nang∙ni helmet gananichi na∙a a∙sel ong∙jawaha inede ong∙taija indiba ua helmet nang∙ni janggiko jokatna gita dakchakbea aro an∙ching bang∙a changon a∙sel ong∙anirango helmetni naljokataniko nikna man∙a. Apsandaken ia tikaba an∙chingni janggiko ia kenbegnigipa sabisioni jokatna gita ama ba bil donga. Indake dakanichi an∙ching, an∙tangni janggikosan naljokata ong∙aija indiba an∙chingna sal wal neng∙takpilgija dakdile on∙enggipa Doctor aro nurserang aro dingtang dingtang hospitalo kam ka∙enggiparangnaba kamrangko olgrokata, indake an∙ching uamangna dakchakaniko on∙pilskana man∙a.
Da∙ororo an∙ching bang∙en social-mediarango jekai whatsapp, facebook aro dingtang dingtang koborko watengiparangoniko ia tikani gimin ong∙gija agan gipataniko nikna aro knana man∙enga. Ia indakgipa koborrang jekai tikako su∙aniara manderangko sichinisa su∙enga ba bang∙a manderangan tikako su∙anichi sienga ine manderangko jajaatna watengipako bang∙a changon an∙ching niksona gita man∙enga. Indiba ian kakket ong∙ja maina ia tikakora an∙ching gita ramram manderangni targipa ong∙ja indiba dal∙dalgipa skia man∙gimin gisik a∙ning bite chanchina man∙giprangsa tariaha. Uni gimin tol∙e jangbingbranggiparango bebe ra∙na nangjawa aro ia tikako ra∙na gita jajrengna nangjawa. Ia niamrangko manianichi aro Tikako ra∙aniara an∙chingko sabisionisan champengata ong∙aija indiba an∙ching songsal-noksalni namgipa songdongipaba ong∙ata. COVID sabisi oni naljoknade an∙ching jinma apsan ku∙monge kam ka∙rimosa chena gita man∙gen!
