Tura, May 1: Da·ororo namjabegipa COVID sabisi ta·rakbee giprorobaengani gimin sabisiko champengsona gita Meghalaya a·dokni mongsonggipa damgittam a·jarang Shillong, Jowai aro Tura songjinmarango agrepile manderangni re·jipjanganirang, chotchanggija garirang re·ruraanirang aro mande jinma tom·dakanirangko komiatna gita, May 1 tarik, Sonibar pring 5 bajioni re·baenggipa May10 tarik pring 5 bajiona gimik sal 10 rangna champengataniko dakangaha.
Indake ong·engon, Tura songjinma aro uni wilwilao donggipa bang·bata dokkanrangko chipatahaoba nangchongmotgipa bosturangko palenggipa dokkanrangkode, West Garo Hills-ni Deputy Commissioner kulina on·aiaha. Mongsongbate gari-gorani skatang re·ruraanirang, mande jinma tom·dakanirang aro antidamrango manderangni jinma tom·dakanirangko komiatna gitasa sorkari ge·etanirangko on·aha, jedakode manderang gnigipa changna namjabate sokbataienggipa COVID sabisioni naljokna man·gen.
Indake ong·oba, bang·a manderangan ia champengataniko lockdown ba chu·gimk chipchangatani ine ma·sisrete Sukrobar salon antigimikna korosrangko ka·e donriktokaha, maina re·anggipa bilsio lockdown ong·ani somoio bang·a manderang neng·nikaniko chagrongahachim, indiba ia chango lockdown-ko ong·atgija, manderangni agrepile skatang re·a-donanirangko aro gari-gora re·ruraanirangko komiatna aro gipin biaprangoni re·baenggiparangko champengsona gitasa sal 10-na champengataniko a·bachengataha.
Indake, sal 10-rangna champengatani skanggipa salo pilak dokkanrangko kuliani, manderangni skatang re·a-doanirang, garirang re·ruaraani aro mande jinma tom·dakanirang Tura songjinmao namen komianiko nikna man·angaha.
