Shillong, June 23: COVID-19-ni a·sel ia bilsini SSLC aro HSSLC porikkarangko serikna man·gijagipa candidate-rangna mikkang jao Meghalaya Board of School Education (MBOSE) porikkako ra·tainaba gnang.
Iani bidingo Meghalaya a·dokni Education Minister Lahkmen Rymbui, Education department aro MBOSE-ni official-rang baksa tom·e chanchirimangaha.
“COVID-19-ko man·ani a·sel ba containment zone-rango dongna nangani a·sel porikkarangko serikna man·gijagipa chatro chatrirangna chinga July jani gisepon SSLC aro HSSLC porikkarangko ong·attaina tik ka·angaha,” ine Rymbui parakataha.
Health department baksa chanchirimchenge aro a·dokni obostarangko nichengesa ia porikkarangko ong·atgen ineba Education Minister talatangaha.
Education Minister-ni parakatani gitade, gimik sak 74 chatro chatrirang SSLC porikkako serikna man·jaha aro sak 34-de chu·gimik SSLC porikkakon serikna man·srangjahachim.
Apsan daken, HSSLC porikkakoba sak 92 chatro chatrirang, mitam subject-rangko serikna man·jaha aro sak 15 candidate-rangde chu·gimik porikkakon serikna man·skajahachim.
Indake ong·engon, HSSLC-ni bangki subject bri dongkuenggipa porikkarangko ong·atjahawa aro ia subject mingbrina mark-rangko Meghalaya Board of School Education (MBOSE)-ni dongimin niamrango pangchake on·angskagen ineba a·dokni Education Minister parakataha.
Rymbui-ni parakatani gitade, Class 12 board porikkani result-ko July 31 tarikna skangan parakna gita sorkari miksongenga.
SSLC porikkani result-ko parakani bidingo janapatskaengon, COVID-19-ni a·sel result-rangko tarianio neng·nikanirangko man·na nangkuenga indiba SSLC-ni result-ko man·a dipet ta·raken parakna gita sorkari jotton ka·enga ine Education Minister parakataha.
COVID-19-ni a·sel serikna man·gijagipa chatro chatrirangna porikkarangko bon·kamgipa changna ong·atanggen ineba Rymbui parakataha.
