Shillong, Jan 27: Budbar salo, a•songni Republic Day-ko manianio bak ra•pae COVID-19-ko warachakna dongimin niamrangko pe•aha ine matnanganirangko man•ahani gimin Bristibar salo, Meghalaya a•dokni Chief Minister Conrad K Sangma, talatanirangko on•angaha.
Chief Minister-ni parakatani gitade, uo dakna nangani kamrang bang•en donggenchimoba ua pangnan simsakgipa ong•e niamrangko ja•rikrongachim.
“Anga saksa Chief Minister ong•e dakna nanggni kamrang bang•en donga indiba anga pangnan niamrangko nanga gitan ja•rikenga,” ine Sangma, an•tangni kosako iandake matnanganirangko man•ahani gimin suk ong•gijaniko parakataha.
Re•anggipa January 21 tariko Meghalaya a•dokni bilsi 50 gapaniko manianioba ua an•tangan be•en an•sengjae, ua somoio COVID-na porikka ra•anio positive ong•kujagenchimoba manianio bakko ra•jana gita tik ka•aha ineba Sangma parakataha.
“Ua somoio anga manianio bak ra•na sikbebegenchimode ja•manoba porikka ra•na man•aiachim indiba anga indake dakgija an•tangan bak ra•epajaha. Uni gimin iandake angni kosako matnanganirangna anga suk ong•ja aro angni chanchiani gitade, angni kosako iandake matnangenggipa manderang, maming gipin kamrang dongjakon,” ine Sangma aganaha.
Manderang chong•mot a•selkode ma•sitokjaenga ine janapatengon, ua maming dakeba COVID-ni niamrangko pe•a dongja aro pangnan chanchie kam ka•gipa mandesa ong•a ine Chief Minister talataniko on•angtaiaha.
Re•anggipa January-ni 21 tariko Chief Minister an•tangan, COVID-19-na porikka ra•anio positive ong•aha ine social media-o jinmana parakatahachim.
Apsan daken, a•dokni Governor Satya Pal Malik-ba COVID-19-na porikka ra•anio positive ong•aha aro Republic Day-ko manianio bak ra•pana man•jawaha ine Mongolbar salo, social media-o parakatskaahachim.
Indake ong•engon, Bristibar salo a•dokni Chief Minister aro Governor-ko apsan noksao watatani ja•manba manderangni gisepo sing•doanirang ong•kattaiaha. Raj Bhavan-o Governor-ni ‘birthday gift’ on•ako Chief Minister-ni ra•chakmitingko ia noksao nikna man•ahachim. Sakgnian COVID positive ong•ani ja•manba apsan noksao nikna man•ahani gimin manderang, sing•dona a•bachengtaiaha.
