Shillong, June 14: Meghalaya a·doko COVID-ni obostako nipilna gita Sombar salo, Meghalaya Legislative Assembly-ni Speaker Metbah Lyngdoh, dingtangmancha tom·aniko Shillong songjinmani State Convention Centre-o ong·atangaha aro ia tom·anio Meghalaya a·dokni Chief Minister Conrad K Sangma, Health Minister AL Hek aro gipin cabinet minister-rangko man·chape, Opposition dolni dilgipa Mukul Sangma aro dingtang dingtang political dolni dilgiparangba bakko ra·angaha.
Ia tom·anio health department-ni official-rang, sorkari aro opposition dolni dilgiparangna agan-talate on·angengon, gnigipa changna COVID-ni giproroaniko warachakna ka·enggipa kamrangni gimin aro gittamgipa changna COVID-ni giproroaniko champengsona tarisamsoanirangko talate on·angaha.
Ia tom·aniko ong·atani bidingo Assembly-ni Speaker Metbah Lyngdoh talataniko on·angskaengon, ia tom·aniko chu·sokgipa ong·aha ine janapatenba, ia tom·anio bakko ra·anggipa MLA-rangba an·tangtangni ku·pattianirangko sorkarina aro health department-na on·angaha ine parakataha.
Ia sabisini giproroaniko warachakaniara dakgrikani gitasa ong·enga aro ia sabisiko warachakanio pilak political dolrangan ku·cholsan ong·e bakrimna nangenga ineba Lyngdoh aganaha.
Opposition dolrangni agan-ku·pattie on·anirangko sorkari see ra·rikaha aro nangani kri ja·kurangko de·anggen ineba Assembly-ni Speaker parakataha.
