Shillong, May 4: Meghalaya a·doko COVID-19 ta·raken giproroengani gimin COVID-19-ni tikarangko maming koros gri indin su·e on·na gita Meghalaya sorkari manchiangaha. Mongolbar salo a·dok sorkari, pong 42,000 tikarangna korosrangko tika tarigipa company-na gamataha.
Iani bidingo kobor ra·timgiparangna u·iatengon, tika pongprakna sorkari gong 300/- ka·e gamataha aro da·o ia samrangko a·dokona sokbaako sengengkua ine Mongolbar salo, a·dokni Deputy Chief Minister Prestone Tynsong parakataha.
“Samrang a·dokona sokbaahaon chinga bilsi 18 aro una batgiparangna tikarangko indin su·e on·anggen,” ine Tynsong parakataha.
Meghalaya a·doko manderangni nangchongmotgipa bosturang chu·onga gita dongama dongja ukoba sorkari, Mongolbar salo niangjolaha.
A·doko manderangni nangchongmotgipa bosturang chu·onga gitan dongkuengani gimin manderang jajrengna nangjawa ineba Deputy Chief Minister parakataha.
“May aro June jagnina Pradhan Mantri Garib Kalyan Anna Yojana (PMGKAY)-ni mirongrangko a·dokna on·dapatahani gimin anga ma·mong sorkariko mittelpilna ska,” ine Tynsong aganaha.
Mirongrangko salbana a·bachengengaha aro ia jani gisepon mirongrangko sualatgnok ineba Deputy CM parakataha.
Mongolbar salo sak 339 manderang, Meghalaya a·dok gimiko COVID-19-ko man·dapaha aro uandaken da·o a·doko COVID man·e dongenggiparang sak 2019 gapengaha. Salsani gisepon sak 204 ia sabisioni nampilskaaha.
