New Delhi, May 17: Defence Research and Development Organisation (DRDO)ni tarigipa COVID sajinmako warachakani sam 2-deoxy-D-glucose (2-DG)-ni skanggipa bakko a·songni Defence Minister Pa Rajnath Singh aro Union Health Minister Dr Harsh Vardhan-maang, Sombar salo oprake on·angaha.
Ia samko, Dr Reddy’s Laboratories baksa nangrime DRDO-ni Institute of Nuclear Medicine and Allied Sciences (INMAS) dingtangmancha tariaha.
Iani bidingo DRDO-ni Chairman Dr G Satheesh Reddy-ni aganani gita, DRDO aro Dr Reddy’s lab, ia samko chu·gimikan dake-ka·e nichengaha aro gimik ge 30 hospital-rango aro bang·a sagiparango iako porikka ka·e niangaha. Sajinmako warachakna skanggipa bako ong·katatenggipa ringani ge 10,000 2DG samrangko re·baenggipa antio manderangna a·bachengate on·anggen, ine DRDO official-rang Sukrobar salo koborna parakangaha.
Samko powder-ni bimango tariaha, jekon chi baksa brine ringna nanga. Ia sam, sabisiko gipatroroatgipa virus-ni chimonge donganiko champenge aro bilko ong·katate virus gnanggipa chonchongipa tanggiparang ba cell-rango bilake kam ka·enba virus-ni dal·roroaniko champenga. Virus donggipa cell-rangko basee ia samni bilake kam ka·anichin ia samko dingtangmanchagipa ong·ata.
Da·omiting gnigipa bako COVID-19 sajinmani chipakkore gita sokbataianio bang·a sae donggiparangan oxygen-o pangchakna nangenganio neng·nikaniko chagrongenga aro hospital-rango donge sanna gita nangenga. Ia samni, virus gnanggipa cell-rango bilake kam ka·ani a·sel bang·a manderangni janggirangkon naljokatna man·na gita ka·dongsoenga. Unbaksana, COVID-19 sagiparangko sanna hospital-rango donganikoba komiatgen.
