Guwahati, April 02: Assam a·dokni saksa bilsi 32 ong·gipa Diganta Das, mandeni janggi tanganio chagronggipa neng·nikanirangko aro tangka-paisani gita neng·nikanirangko maikai chee tangna gita nangachim, uarangni gimin sakgipinrangnaba dakmesokaniko on·angaha.

A·gilsak gimikchi Covid sajinma giproromitingo aro iani a·sel a·song gimiko chipchangatani somoio Das-ni, Andhra Pradesh a·doko bading-chiwale tangka-paisa chimonggiminko bon·attokani golpoan, indakgipa neng·nikani somoio chee janggi tangani gimin sakgipinrangkoba didiani gita ong·skaaha.

Assam-ni Gohour songoni Diganta, 2012 bilsio Bengaluru-china kam sandiroroe sokeani ja·man, dingtang dingtang dakgipa kamrangko ka·na a·bachengaha aro dormarangko chu·onga gitan man·engani gimin ua kusiba ong·aiengachim. Indake, apsan bilsion uni ripeng Surya Thapa baksa idlil, dosa, aro parota cha·anirangko tarigipa ge·sa company-o napangaha aro uandaken, Das aro uni ripeng Surya, Bengaluru-o parota tarigipani kamko ka·e parota tariani gimin aro bading-chiwalani budirangko skie ra·joljolna gita cholko man·aha.

Chimonggimin tangka-paisachi uamang an·tangtangari cha·ani tarigipa company-ko sajinma giprorona skangan Andhra Pradesh-o a·bachengtokaha, indiba rasong gribee Covid-19 sajinma giproroani a·sel minggipin cholrang dongjae songtang-noktangona re·pilbana gita nangaiaha.

Songtango donge minggipin kamrangko ka·chakatgenchimoba Das, nokdangko chalaina gita chu·ongmanjaha aro uandaken Covid sajinmani a·sel rakbegipa janggi tanganiko ua chagrongna gita nangaha. Indioba, changsao ua an·tangni parota tariani gimin skie ra·bagiminko jakkalskana chanchiskaenba, apsandakgipa kamko Bengaluru, Kerela, Mysore aro Hyderabad a·dokrango ka·e janggi tangbagipa Assam, Udalguri district-oni saksa Farizul Hoque minggipako okgame kamrangko ka·chakatani gimin chanchirimaha.

Diganta, da·o an·tangni dokanko Biswanath Chariali-o kullienba Nepal aro Assam-ni gipin biaprangoni gimik-gimang sak 10 kam ka·giparangko rakkie parota tarie bading-chiwalani kamko ka·chatskaaha aro paltimgipa sak-chet manderangkoba ua kamo rakkina gita man·aha. Uandaken, Assam a·dokni Sonitpur, Lakhimpur, Dhemaji, Dibrugarh aro Tinsukia district-rangona kingkingan ua, parota-rangko sokatangna gita man·pilengaha.

Indake ong·engon, Diganta-ni janggi tangao gita chacha Covid-19 sajinmani a·sel kamrangko bon·atna gita nangao ga·akgipa manderangnaba ian skidapani ong·gen ine nikatna gita man·enga.

Iakoba poraie nina man·gen: Garo Hills-o Palm Sunday-ko manianga