Guwahati, July 12: Assam a•doko matchu den•ani, matchu cha•ani aro matchu salruraaniko champengna gita ra•gatenggipa Cow Protection Bill-ni bidingo chanchirimna gita Sombar salo, ia Bill-ko Assam-chi Chief Minister Himanta Biswa Sarma, Assam Legislative Assembly-ni budget session-ona ra•angaha.
Ia Cow Protection Bill-ara, Assam a•doko matchu den•aniko, cha•aniko aro salruraaniko champengatan baksana maming permit gri Assam a•dok gita matchu salangna, Hindu, Jain, Sikh aro matchu be•en cha•gijagipa biaprango matchu be•en palaniko champengna aro mite nokrangoni ba Hindu-rangni olakkiram nokrangoni sambarango matchu be•en ba matchuni bostu palaniko champengna ra•gatenggipa niamrang ong•engachim aro ia niamrangko pe•genchimode ia gital niamo pangchake komibeoba bilsi 8-ona kingking pattoko donako man•genchim.
Assam Legislative Assembly-ni Budget Session-ko Sombar salo a•bachengatenba jagimik ong•atna siengani gimin ia Bill-ni bidingo Assam Assembly-ni membor-rang jera ra•grikanggen.
Ia gital Assam Cattle Preservation Bill 2021-o donsoenggipa niamrangara:
1.Sorkarini licence gnang be•en den•gipa nokrangona agrede matchurangko den•na man•jawa.
2.Be•en den•ani certificate-rangko sorkari veterinary officer-rang on•gen.
3.Be•en den•gipa nokrangna biapko on•na certificate-rangko sorkari veterinary officer-rang on•gen.
4.Matchu aro matchu bi•sarangko den•na man•jawa.
5.Bilsi 14 batgimin matchurangko den•na man•jawa.
6.Matchu be•en ba matchu be•enoniko tarigimin bosturangko sorkarini on•gimin biaprangona agre palna aro brena man•jawa.
7.Hindu, Jain, Sikh aro matchu cha•gijagipa jatrangni songdongchakgipa biaprango matchu be•en ba matchu be•enoniko tarigimin bosturangko palna sim•na man•jawa.
8.Mite nok ba Hindurangni olakkiram nokrangoni kilometre 5-ni ning•o matchu be•en ba matchu be•enoniko tarigimin bosturangko palna man•jawa.
9.Badiaba biaprango ia niamrangko pe•enga ine nikgenchimode sub-inspector-na komigijagipa police officer aro veterinary officer-rang, nape am•sandina bilko man•gen.
10.Permit gri matchurangko salrurana man•jawa.
11.Permit gri matchurangko Assam gita gipin a•dokrangona salangna man•jawa.
12.Matnangko man•gipa mandena public prosecutor-ni gita jaminna bi•aniko knachakna cholko on•jaskalde jamin man•jawa.
13.Ia gital niamni ning•o niamko pe•e dosi ine mingako man•genchimode ua mandeko bilsi 3-oni bilsi 8-ona kingking pattoko donna man•gen.
14. Niam pe•gipa mandeni kosako gong lak 3-oni lak 5-ona daiko ra•gen.
15. Toromni gita maiba manianirang donggenchimode matchuko den•a man•gen.
