Shillong, Sep 16: Meghalaya a•dok gimiko CrPC aro CPC-ko ra•gatna gita a•dok sorkarini u•iatgipani bidingo Khasi Hills Autonomous District Council (KHADC)-ni dilgiparang, dingtang dingtang dolrang baksa chanchirimangkugen ine KHADC-ni chief executive membor (CEM) Titos Chyne parakataha.
Iani bidingo KHADC-ni pilak MDC-rang Bristibar salo, apsan tom•e chanchirimangaha aro ia tom•anio Congress, NPP aro UDP-ni membor-rang bakko ra•angtokaha.
KHADC CEM-ni parakatani gitade, CrPC aro CPC-ni bidingo mamingko tik ka•na skangba uamang, jatni dilgiparang aro songni nokni manderang baksa bon•kame chanchirimtaina ia tom•anio manchie donangaha.
Ia tom•aniko re•baenggipa antio ong•atnaba gnang ine janapatengon, a•doko CrPC aro CPC-ko ra•gatna gita sorkarini u•iatgipani bidingo ia tom•anio uamang che•em che•em chanchirimangenba, tom•anio jinma jekon namnike ra•chakgenchim, uko Chief Minister-na u•iatskagen ine Chyne parakataha.
Ia tom•aniona uamang, District Council-ni legal team aro dingtang dingtang Hima-ni legal counsel-rangko okamatgen aro iani bidingo a•dok sorkarini Law department aro District Concil Affairs department-na u•iatgen ineba Chyne aganaha.
Iani bidingo sikkele kamko ka•jachina aro district council-na chanchirimna gita somoiko on•kuchina gitaba ua a•dok sorkariko didiataha.
