New Delhi, Jan 3: Da·ororo giproroenggipa sabisina Bharat Biotech aro Oxford-AstraZeneca-ni tarigipa tikarangko bon·kame ra·chakangenba, ia tikarangara mandena maming kenna nangani dongja ine Robibar salni bako Drugs Controller General of India (DCGI) VG Somani, a·songo songdongenggipa manderangna ku·rachakaniko on·angaha. Serum Institute of India-ni tarigipa Oxford-AstraZeneca tika baksana a·songni nanggitikan somoio jakkalna gita Bharat Biotech-ni tarigipa Covaxin tikako ra·chakangani ja·man ia tikarangara mandena maming kenchakna nangani dongja ine Somani parakataha.
“Ia tikarangko name nipiltaiani ja·mano Expert Committee-ni ku·pattianio pangchake, M/s Serum aro M/s Bharat Biotech-ni tikarangko nanggitikan somoirango jakkalna gita CDSCO ra·chakangaha,” ine press conference-ko ong·atanio Somani parakataha.
“Manderangna maiba kenchakna nanganirang donggenchimode chinga ia tikarangko ra·chakjawachim indiba ia tikarangara namen naljokgnigipa samrang ong·a. Sam ge·antinan adita fever dongani, sa·dikani aro be·en naanirangde dongaia indiba ia tikana manderang bilgrigen ine aganania tol·anisan ong·aia,” ine DCGI-ni agangipa kattarangko ANI toe parakataha.
Da·ororo giproroenggipa sabisini a·sel bang·a manderang siangengoba India a·songosan ong·aigija dingtang dingtang a·songrangoba badiaba badiaba dolrang, ia tikarangni kosako tol·e jangbingbangatna jotton ka·engani gimin Somani, manderangna talataniko on·angaha.
Re·anggipa Sonibar saloba Samajwadi Party-ni dilgipa saksa Ashutosh Sinha, ia sabisini tikara mandeko bilgriatna man·a ine a·kangatahachim. Samajwadi Party-ni dilgipa Akhilesh Yadav, ia tikako ra·jawa ine aganani ja·mano Sinha, ia tikara mandeko bilgriatna man·a ine a·kangskaahachim. Ia tikako ra·jachina gita ua Uttar Pradesh a·doko songdongenggipa manderangkoba didiangahachim.
Ia tikarangko ra·chakahani gimin a·songni Prime Minister Narendra Modi-ba DCGI-ko mittelpilangaha aro rakbee kamrangko ka·enba ia tikarangko man·e on·ahani gimin sam tarigiparangko aro scientist-rangkoba mittelpilangskaaha.
“A·gilsak gimikon manderangni nangchongmotengmiting somoio India a·songo tarigipa samrangko on·aniara India a·songo songdongenggipa mande sakantinan mikkim rasongni ong·gen,” ine a·songni Prime Minister, ia tika minggniko DCGI-ni ra·chakangani ja·man social media-o parakataha.
Ia tikani skanggipa bako a·songni krorsa healthcare worker-rangna aro krorgni frontline worker-rangna tikarangko indin on·anggen ine re·anggipa Sonibar salo Union Health Minister Harsh Vardhan parakatahachim.
