Shillong, June 4: Ia sal somoirango giproroenggipa coronavirus, jekon ‘Delta’ virus ine biming donahachim, ian namen bilakgipa aro kenbegnigipa ong·ani a·selsa manderang sibatenga ine Meghalaya a·dokni Chief Minister Conrad K Sangma parakataha.
Ia jo·ongara da·o dingtangaha aro skanggipa changona bate da·o namen bilakbataha aro kenna nangbataha ine janapatengon, a·songni gipin songjinmarango gitan Meghalaya a·dokoba da·o adita salrangni gisepon obostarang dingtang ong·naba gnang ine Chief Minister, an·tangni ka·dongchakenganiko parakataha.
Sukrobar salo, a·doko ong·enggipa obostarangko nipilna gita tom·aniko ong·atani ja·man kobor ra·timgipa manderang baksa agangrikengon, “Ia salrango batrikrikenggipa sabisiara namen bilakbata aro ian mandeni ka·sopko kamatna man·a. Ia jo·ongara obostani kri batrikrikgipa ong·a aro iako ‘Delta’ virus ine mingenga. Iani a·selsa ia sal somoirango manderangni bang·e sianirangko nikna man·enga aro ian namen jajrengna nangani ong·enga,” ine Conrad parakataha.
Chief Minister-ni talatani gitade, ia jo·ong changsa mandeo napahaon sal 5 ba sal 7-ni gisepon ia jo·ongara dal·rorona ba jelrorona man·a aro unon ua mande bilonge sabana a·bachengronga.
Iani a·selsa ia somoirango COVID man·giparang ka·sinsin komiangengoba sianggiparang batrorobaskaenga ine Sangma parakataha.
