Tura, Oct 17: Re·anggipa October 16 tariko Dadenggre Civil Sub-Divisiono gitalgipa  Sub Divisional Kachari ko rikchakatna pangchakani ro·ongko Meghalaya High Court ni mande ra·ako man·na kragipa Chief Justice Biswanath Somadder, Meghalaya ni Law Minister aro joltangni MLA Pa James Sangma ni mikkango oprake on·angaha.

Uko orprake on·anio Law Department ni Commissioner & Secretary Pa W Khyllep, High Court ni Registrar General Pa E Kharumnuid, District & Sessions Judge East Khasi Hills, District & Sessions Judge Tura, DC West Garo Hills, SP Tura aro gipin officialrang bak ra·aha.

Chief Justice ia salara namen dingtangmanchagipa ong·a maina kakket bichalko sakantian man·na nanga aro kakketgipa bichalko democracy ni dotgittam krongrang legislature, executive aro judiciary chi on·na man·a ine aganaha. Ia gital pangkamgipa kachari nokko rikna pangchakani ro·ongko songaniara ramram aro sakanti manderangna kakketgipa bichalko ja·manchakenggipa biapo altuae ba sepangbate on·na man·anian ong·a ineba aganangjolaha.

Law Minister Pa James Sangma Dadenggreo dingtang judiciary ko man·aniara rasong chabeani ong·a aro ian judiciary na kamko ka·enggipa sakantini kona noksikni manderangona kakket bichalko sokatna namgipa aro bimchipbegipa ja·ku ong·a aro ia gital kachari nokko rikaniara manderangna mikkangchi jakkaltobegipa ong·gnok maina mande sakantian kakket bichalko man·a kragipa bil donga ine aganskaaha.