Tura, March 8: Bilsiantin a·gilsak gimikchi manirongenggipa International Womens’ Day (IWD) ba Me·chikrangni salko West Garo Hills a·jani Dadenggre Sub Division-o donggipa kal·chakram biapo Sombar salo maniangaha.
Ia programko, Meghalaya State Rural Livelihood Society (MSRLS)ni dakchakachi me·chikrangni bil gnanganiko aro uamangni dakna man·gnirangko mikkangchi niksengatna Bakdil-ni gita ong·ataha. Program-o Dadenggre-ni Civil SDO, Pa Jagadish Chelani mongsonggipa sokgipa ong·e bakko ra·angaha.
Tom·ao bakko ra·anggipa jinmana aganprakengon, ia salko maniara me·chikrangni chu·sokanirangko dingtangmancha parakatani sal ong·a aro me·chikrangni dal·batgipa dakgni-ka·gnigipa kamara me·asarang gita apsan gadango an·tangtangni bilko jakkale kamrangko ka·na gita me·chikrang bil gnang ine Pa Chelani aganaha.
Una agreba, bilsi chu·onggija seng·gnang bia ka·e segipa ra·anichi nokdangna dal·bea duknirangko ra·baani gimin me·chikrang dambeoni bia ka·na nangja ine didiangenba, Me·chikrang dambeoni segipa ra·anichi namgija obostarango ga·ake songsalna namgija bimingko ra·baa, uarangko chel·chakna gita bilko jako ra·e nirokatenggipa indaka programrangko ong·atachi an·o keenggipa dambe ma·giparangna mikrakataniko on·ani ong·a ineba ua agan-parakataha.
International Womens’ Day-ko manianiara mongsongbate me·chikrangni gadango tang·doaniko, ka·donganiko, niksenganiko aro kamrang dingtanganiko gipin a·songrangna u·iatgrikaniba ong·jola.
Unomiting, ia programko ong·atanio dingtang dingtang me·chik dolrang aro songsalna kam ka·giparang an·tangtangni jaktangchi tarigimin bosturangko ra·bae jinmana mesokangjolaha.
