Tura, Aug 17: West Garo Hills a·jani District TB Hospital-ni gita Darengre PHC-o TB saenggipa manderangna agan-ku·pattie on·ani program-ko ong·atangaha aro ia program-ko ong·atanio TB Hospital-ni doctor-rang, District Medical & Health Officer aro gipin doctor-rangba bakko ra·angaha.

Ia program-ko ong·atanio DM&HO Dr Bijay Deb Barma, mongsonggipa aganprakgipa ong·e bakko ra·angaha aro tom·aniko District Tuberculosis Officer Dr Litha A Sangma dilangaha.

Ia program-ko ong·atanio West Garo Hills a·jani DM&HO Dr Barma, TB saenggipa manderangna agan-ku·pattianirangko on·angengon, saoba an·tangko TB-na porikka ra·e nianio positive ong·genchimode jadokna samrangko aro sorkarini dakchake on·anirangko indin ra·na man·gen aro porikkakoba an·tangni sepangbatgipa health centre-rangon tangka paisa gri indin ra·e nina man·aigen ine talataniko on·angaha.

Ia program-ko ong·atanio dingtangmancha TB sabisiko bon·atna gita jinma ku·mikchetanikoba dakangaha.