Shillong, Jan 19: “Angni chagronggimin bilsi 2003-oni MUA sorkario angni cha•totgimino nikani gita, Meghalaya a•dok man•chengaoni ithihas-o Dr. Mukul sangma-an dai ra•batsranggijagipa skotong minister ong•gipa ong•aigen” ine Meghalaya a•dokni dakchakgipa skotong Minister Pa prestone Tynsong aganaha.
MUA-ni sorkari rikani bilsirango aro Dr. Mukul Sangma-ni skotong minister ong•ani somoi Pa Tynsong-ba Minister ong•paachim. Ua congress baksa melina man•gijani a•selo 2017 bilsio cabinet-niko ra•onatan baksa congress dol-ko wataha.
“Angko office-ona re•baja aro dai ra•ja ine matnanganiko angaba nika indiba uan kakket ong•srangja, bilsi 2013-2017 bilsiona Dr. Sangma-ni office-ona gisepsan re•baaniko darangan ui•a. Kakketko aganode jagimiko bini office-ona re•baa sal 15-rangsan neng•edike ong•aigen. A•dokni skotong Minister-an jao sal 15-rangsan office-ona re•baiode ian kraani ong•ja. Unbaksa bia bachi re•anga uko darangba ui•ja maina songreani serikaniko tarirongja” ineba Pa Tynsong agankuaha.
“Angko cabinet-oniko 2017-o galani tapan anga kusi ong•jaha aro anga biming kusi ong•chongmotjaha. Kakketko aganode anga Dr. Mukul sangmani kamrangna kusi ong•jaani a•selo bonkamaode congress dolkoba watsrange kataiaha” ine Congress doloni ong•katani a•selkoba talatjolaha.
Pa Tynsong-ni Pynursla elaka-na bang•a silroroaniko kamrangko on•aha ine Dr. Mukul Sangmako de•mitele agangipa video-ni gimin sing•on, “ Ian Dr. Mukul sangma-ni a•selchisan ong•ja indiba anga ua elakani seoka man•gipa MLA ong•e rake kam ka•aha aro dingtang dingtang Department-rangni nangnike dorgasto on•giminrang-ko niroke kam ka•ani a•selsa Pynnusula jol-ni silroroani ja•pangde ong•aia, ian Dr. Mukul Sangma-ni angni Elakana-na gisik nange kam ka•e on•ani inede agana man•jawa” ineba Pa Tynsong talatdapaha.
