Dalu, April 13: Dalu, Chaipani-ni pu·onchakgipa biapni a·palo manderangoniko vote-rangko bi·amani a·sel saksa BJP dolni dilgipa Anoy Paul-ko gipin dolrangna chakgiparangni dokgrimanichi adita golmal-gondogolrang ong·anganina jolo songdonggipa dingtang dingtang jatrang mijalo tom·e chanchirimangaha.
Mijal attam 3 bajimango Dalu-o songdongenggipa dingtang dingtang jatrang jekai Garo, Bengali, Koch, Hajong aro gipinrang tom⋅aniko ong⋅ataha, jeon Begali-rangni Gaobura, songko-nokko dilgiparang aro minggipin kamko jako ra⋅e ka⋅giparang baksana bading-chiwale cha⋅giparang gimikan bakko ra·angtokaha.
Tom·ao bakko ra·e agananio, Dalu-o skang chengonin gimik jatrangan jatsa-jatgipin baksa apsan melie janggi tangrimbaenga aro jatska, toromska kajia-golmal gri janggi tangbaen mitamrang siang-bon⋅angtokaha indiba maming kajia-golmal grian janggi tangbaaha ine Killapara-ni Gaobura Subhas Dalu agan-parakaha.
Indake ong·genchimoba, bang⋅gija bilsirangna skang Anoy Paul-ni re⋅baani ja⋅man dingtang dingtang dolrangko bikote ba ra⋅bae jat aro toromni gisepo ong⋅gijagipa kattarangko agane bang⋅a ma⋅sisretgrikanirangko ong·ate kajia-golmalko ra·bana jotton ka⋅anirangko dakrongenga ineba ua talataha.
Tom·ao, Anoy Paul-ni indakgipa ong⋅gija kamrangko pilak Dalu-o songdonggipa jatrang jegaltokaha aro mikkangchiba indaken ku⋅monge meli-nangrime dongangkuna gita jinmaan tik ka·angaha.
A·jao songdongenggipa gipin jatrang skangonin maming onchepako man·gijan janggi tangrimbana man⋅anina kusi ong⋅bee A⋅chik jatkoba mittelangjolaha ine tom⋅ao dongpagipa saksa Hub News-na u·iataha.
