Tura, Feb 27: West Garo Hills a·jani Dadenggre CHC-ni ning·o donggipa Damal A·sim songo, an·o dongenggipa dambe me·chikrangna uamangni an·seng-baljokani bidingo nangchape mikrakatani programko Sonibar salo ong·atangaha.

Ia programo, Dadenggre Civil Sub Divisional Officer (SDO), Pa Jagadish Chelani mongsonggipa sokgipa ong·e tom·bagipa manderangna aganengon, an·o dongenggipa dambe me·chikrangni an·tangtangko an·seng-baljoke rakkina bang·a dingtang dingtang dakna nanggni kamrangko agan-talate on·angaha, jedakode an·o keenggipa dambe me·chikrang hospitalrango bi·satangko atchiatani ja·mano maming a·sel-obosta gri an·seng-baljoke dongna man·gen. Uni gimin sakanti an·o dongenggipa dambe me·chikrang an·tangtangko simsaksona nanga ineba SDO aganangkuaha.

Unbaksana, Dadenggre Block-ni BDO, Pa Nipon Hajong salni programo dongpae sorkarini on·enggipa bang·a namgnirangko ra·e an·tangtangko naljokatna be·en-bimangko an·seng baljoke rakkichina didiangskaaha.

Apsandake an·o dongenggipa me·chikrang sepangbatgipa sorkarini sanchakram biaprangona re·ange namgnirangko man·na aro sorkarini on·enggipa scheme-rangko ra·na hospitalo bi·satangko atchiatani somoio an·seng-baljokaniko man·na gita gong·raken an·tangtangni bimingrangko segattokchinaba Dr. D. Marak, sakantikon mol·molangaha.
Ia programko ong·ataniara seng·gnang bia ka·e an·o keenggipa dambe me·chikrangna u·iataniko on·na aro dambe ma·giparang maikai uamangni bi·satangko an·seng-baljoke rakkina man·gen ia miksonganio mikrakatani programko ong·atangaha.

Una agreba, lekka-pora aro gipin dingtang dingtang kamrangko saksa-sakgipinna sokatna ia programni bak gita dingtang dingtang kal·susaanirang, kan·dikgipa sing·anina aganchaksusaani aro chroksusaanirangkoba ong·atangjolaha.