Guwahati, Dec 9: December-ni 11 tarikko ‘Black Day’ ba andalgipa sal dake manianggen ine North East Students Organisation (NESO) parakataha.
NESO-ni u•iatani gitade, ia salo salgro salaramni pilak a•dokrangon NESO-ni ning•o donggipa dolrang gisim nisanrangko ra•e, mongsonggipa biaprango an•tangtangni duk ong•aniko mesokanggen.
Salgro salaram a•dokrango dingtang dingtang dolrangni jegalenggipa Citizenship (Amendment) Act-ko re•anggipa bilsini December 11 tarikon Parliament-o pass ka•ahachim ine nikna man•a.
“December-ni 11 tariko salgro salaramni pilak a•dokrangon gisim nisanrangko ra•e mesokna NESO tik ka•angaha,” ine NESO-ni chairman Samuel Jyrwa parakataha.
Salgro salaram a•dokrango songdongenggipa manderangni jegalaniko knachakgija India sorkari, ia CAA-ko 2019 bilsini December 11 tariko pass ka•ahani gimin ia salko pangnan salgro salaram a•dokrango andalgipa sal ine gisik ra•kamgen ineba Jyrwa parakataha.
Jyrwa-ni aganani gitade, ia December-ni 11 tarikko ‘Black Day’ dake manianiara CAA-ko salgro salaram a•dokrango songdongenggipa manderang da•oba jegalengkua ine ma•mong sorkarina mesokani ong•gen.
NESO-ni ning•o donggipa dingtang dingtang dolrangara, All Assam Students’ Union (AASU), Khasi Students’ Union (KSU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) aro All Arunachal Pradesh Students’ Union (AAPSU) dolrang ong•achim ine nikna man•a.
