New Delhi, Aug 12: Bristibar salo National People’s Party (NPP)-ni office-ko a•songni skotong New Delhi songjinmao, Meghalaya a•dokni Chief Minister aro NPP-ni national president Conrad K Sangma-ni jakchi nokdonggae on•angaha aro ia office-ko nokdonggae on•angani somoio Meghalaya a•dokni Deputy Chief Minister Prestone Tynsong, Manipur a•dokni Deputy CM Joykumar Singh, Meghalaya a•dokni Rajya Sabha MP WR Kharlukhi, Tura-ni Lok Sabha MP Agatha K Sangma aro a•songni dingtang dingtang biaprango donggipa NPP-ni dilgiparangba dongpae bak ra•angaha.
NPP dolara a•songo chetgipa national party ong•a aro ia office-ko India sorkari, Delhi songjinmani 75 North Avenues-o donataha.
Delhi-o NPP-ni office-ko nokdonggae on•angani somoio Lok Sabha-ni gitcham Speaker PA Sangma sagini jikgipa Soradini K Sangma baksana Meghalaya a•dokni gitcham CM aro NPP-ni national vice president DD Lapang-ba dongpaaha.
Ia office-ko nokdonggae on•angani ja•man NPP-ni dilgiparang, Constitution Club-o tom•e, NPP-ko mikkangchi bilakbate rikangkuna gita ku•mikchetangtokaha.
Delhi-o NPP-ni office-ko nokdonggae on•angani somoio NPP-ni national president Conrad
Sangma jinmana aganprakengon, ia office-ko an•tangni pagipa sagi PA Sangma-na on•kangangenba, manderangna aro mongsongbate songsalo bilgrigiparangna NPP kamko ka•angkugen ine parakangaha.
NPP dolara, India a•songni salgro salaram jolrango skanggipa national party ong•a ineba nikna man•a.
