New Delhi, Aug 12: Bristibar salo National People’s Party (NPP)-ni office-ko a•songni skotong New Delhi songjinmao, Meghalaya a•dokni Chief Minister aro NPP-ni national president Conrad K Sangma-ni jakchi nokdonggae on•angaha aro ia office-ko nokdonggae on•angani somoio Meghalaya a•dokni Deputy Chief Minister Prestone Tynsong, Manipur a•dokni Deputy CM Joykumar Singh, Meghalaya a•dokni Rajya Sabha MP WR Kharlukhi, Tura-ni Lok Sabha MP Agatha K Sangma aro a•songni dingtang dingtang biaprango donggipa NPP-ni dilgiparangba dongpae bak ra•angaha.
NPP-ni office-ko nokdonggae on•angani somoio NPP-ni national president Conrad K Sangma jinmana aganprakengon, National Party ong•ani niamko chu•sokatchina gita India sorkari, ia office-ko NPP-na on•aha ine parakataha.
NPP dolara a•songni dolchet national party-rangoni dolsa ong•a ineba ua aganaha.
Delhi-o NPP-ni office-ko kulianiara salgro salaram a•dokrango donggipa manderangna gisik ra•ani somoi ong•enga ine janapatengon, “Salgro salaram a•dokrangoni darang dolba ia gadangona sokkuja,” ine Sangma parakataha.
Sangma-ni aganani gitade, NPP dolko salgro salaram jolosa a•bachengahaoba, chongipa jatrangna aro songsalo galchipako man•gipa manderangna kamko ka•na gita da•o pilak biaprangonan giproroangengaha.
“Re•baenggipa salrango NPP bilakbatatako man•e bilakbatsranggipa dolrangoni dolsa ong•gnok aro re•baenggipa 2022 bilsio ong•atna sienggipa Manipur a•dokni election-oba NPP-ko chegipa ong•atna krenggen,” ine Sangma janapatenba, Manipur a•dokni gital chief minister-ba NPP dolonin ong•gen ine an•tangni ka•dongsoenganiko parakataha.
Mikkang bilsini election-o Manipur a•doko susana gita dingtang dingtang dolrangoni NPP-o napanggipa gital membor-rangkoba ua rimchaksoaha.
NPP-ni office-ko Delhi-o nokdonggaani somoio Meghalaya a•dokni Deputy Chief Minister Prestone Tynsong-ba jinmana aganprakengon, NPP dolko mingnamgipa ong•atna aro PA Sangma sagini nikjumanganggipa kamrangko chu•sokatna gita ku•mong nangrime kamko ka•china gita NPP-ni dilgipaskarangko didiangaha.
“National People’s Party-ni office-ko da•o Delhi-o man•ahani gimin ian salgro salaram a•dokrangna rasong chaani somoi ong•enga,” ine Tynsong aganaha.
Ia tom•anio NPP-ni national vice president Dr DD Lapang-ba jinmana aganprakengon, PA Sangma sagiara salgro salaramni mikkim rasong ong•achim ine mittele aganangaha.
“Ua maming grioni politics-ni kamko ka•na a•bachenge ja•mano Lok Sabha-ni speaker-ona sokangaha. Uni kamrangko an•ching pilakan gisik ra•kamgen aro itihasba uni janggi tanganiko sonani oikorchi see rakkigen,” ine Dr Lapang parakataha.
