Shillong, Dec 21: India a•songni skotong Delhi songjinmaoni skanggipa changna Sombar salo Meghalaya a•dokni skotong Shillong songjinmaona bilbaaha aro ia sildorengo Meghalaya a•dokni Transport Minister Sniawbhalang Dhar-ba gipin songregiparang baksa Umroi-ona re•baaha.
Shillong-oni Delhi-ona sildoreng bilruraatna gita ia bilsini a•bachengonin Meghalaya Transport Corporation tender-ko on•aha aro uandaken da•o bon•kame contract-ko Flybig company man•e, chalaiengachim.
Da•o a•bachengode Shillong-oni Delhi-ona antio changgnisan sildoreng bilrurakugen aro da•o Pandemic-na dongimin niamrang dongani gimin Flybig-ni gita an•tangtangni aircraft-rangkode jakkalkujaenga ine official-rang u•iataha.
Indake ong•engon, ru•uta bilsirangonin Meghalaya a•doko songdongenggipa manderang, a•songni skotong Delhi songjinmaona sildoreng bilruraataniko nangniktokengachim aro da•o Delhi-oni Shillong-ona aro Shillong-oni Delhi-ona sildorengko bilruraatna man•engahani gimin ian Meghalaya a•doko gisik ra•ani sal ong•gen ine a•dokni Transport Minister parakataha.
Delhi-oni Shillong-ona sildorengko antio changgni dake bilruraatgen aro ia sildoreng, re•baenggipa January 4 tarikoni bilrurataigen ineba Transport Minister parakataha.
“Ia sildorengo songregipa manderang bang•batrorobaahaon ia sildorengko Delhi-ona salantian watna man•gnok,” ine Dhar aganaha.
Shillong-oni Delhi-ona sildoreng bilruraataniko sorkari ta•raken a•bachengatna nangnikahani gimin ge 75 seat-rang donggipa Bombardier Q400-ko jakkalchengna nangenga ine Flybig-ni Chief Executive Officer Capt Srinivas Rao parakatskaaha.
