Guwahati, Feb 18: Assam a•doko donggipa Dhubri-oni Garo Hills-ni Phulbari-ona Majuli dolongko kabatna gita da•al Bristibar salni bako a•songni Prime Minister Narendra Modi-ni jakchi video conference gita pangchakaniko songe on•angaha.
Ia Majuli dolongko rikna gita pangchakaniko songe on•angani somoio a•songni Prime Minister, jinmana aganprakatengon, Assam a•doko aro salgro salaramni dingtang dingtang biaprango rama jal•langrangko tariengahani gimin salgro salaram a•dokrangan Salaram Asia-o bijangchi gita ong•gnok ine parakataha.
‘Aatmanirbhar Bharat’-ko a•bachengatanio Assam aro salgro salaram a•dokrangan mangrakbatatgnok ineba Prime Minister parakataha.
Prime Minister Modi-ni aganani gitade, ia rama jal•langrangko tarianichi manderang ka•dongbate, nambate aro somoi bon•atgija songre songgabatna man•gnok aro ian salgro salaram jolrango tourism-ko tang•doatan baksana manderangni janggi tangani gadangko nambatatna dakchakani ong•gen.
A•songni gitcham Prime Minister Atal Bihari Vajpayee-ni sorkariko chalaiengmiting somoionin salgro salaram jolrango namroro silroroaniko nikna a•bachengaha aro da•o ia ‘engine ge•gni’ donggipa sorkarian salgro salaram jolrango namroro silroroaniko tang•dobatataha ineba PM Modi aganaha.
India a•songni salgro salaram a•dokrangko Asia-ni salgipeng salaram a•songrang baksa nangdimeatna gita chi ramarangan mongsonggipa chol ong•gen ineba Prime Minister aganaha.
Ia Majuli dolongna pangchakaniko songe on•anio Union Road Transport & Highways Minister Nitin Gadkari-ba jinmana aganprakatengon, ia gong kror 15,000-ni gital project-rangan Assam aro salgro salaramni gipin a•dokrango re•a doani aro manderangni janggi tangani gadangko dingtangatna dakchakani ong•gnok ine parakataha.
Indake ong•engon, Dhubri-oni Phulbari-ona dolongko kabatna gita pangchakaniko songe on•angahani gimin Meghalaya a•dokni Chief Minister Conrad K Sangma-ba a•songni Prime Minister Narendra Modi-ko mittelpilataha aro ian Assam aro Meghalaya a•dokni gisepo re•a doaniko nambatatna dakchakani ong•gnok ine parakataha.
