Tura, Feb 25: Sonibar salo, District Institute of Education and Training (DIET)-ni gita, DIET Extension Cum Community Awareness Programme-ko February jani 21-24 tarikona, West Garo Hills a•jani Selsela Block-ni ning•o donggipa St Joseph School Hall-o ong•atanggipa Sonibar salo name matchotangaha.
Ia Programme-ni skanggipa salo, dingtang dingtang skulrangoni class IX aro X chatro chatrirangna, Carrier Guidance ba mikkangchi janggi tanganio an•tangtangna janggi tangani cholrangni gimin aro class X porikkarangko sea matchotmano badia stream-ko basee ra•na nangani bidingo, gitcham MCS officer Pa. Mirthnarch K Marak agantalate on•angaha.
Indake gnigipa salo, porikkana tarisamsoanirangko maikai tarisamsoaniko dakna nangachim aro poraianio maikai chu•sokgipa ong•na man•genchim, iarangni bidingo DIET Faculty-ni skigipa Pa. Gretus T Sangma agantale on•angskaaha.
Una agreba, gipin salrango, songni nokni manderang baksa Selsela songni map-ko salenba, skul aro songni manderang baksa maikai nangrimgrike songsalo janggi tangna gita nanga aro da•ororoni chadamberangko u•ie nama ramarangko dilani bidingo, DIET Tura-ni Associate Professor Ma. Terabin Ch Momin talate on•angskaha.
Indake ia programme-o chatro chatrirangna educational games ba kal•susaanirangkoba ong•atangaha aro bakko ra•enggipa ma•a paarangnaba kal•susaanirangko ong•ate chegiparangna boksisrangkoba on•angaha.
Indake ia programme-ni bonkamgipa salo, educational concert-koba ong•atangaha, aro ia concert-o Te. Rikman A Sangma aro uni band, gitrangko ring•dilenba chatro chatrirangko an•saodilangaha.
